Atualità
SCRIBO: Presentaziun dla coleziun de stories cun Rungger y Maruca
Nadia Rungger y Bruno Maruca á presenté incö adöm al assessur Alfreider y l'intendënta Ploner sües döes stories che fej pert dla coleziun dal titul “Scribo" y che é le resultat de n concurs leterar.
En ocajiun dl De internazional dl Liber indoman ai 23 de aurí él le Departimënt y l’Intendënza y Cultura ladina che á orü mët tl zënter les stories nöies de auturies y auturs ladins. Al se trata de stories che é gnüdes realisades por le concurs leterar “SCRIBO” y che é spo gnüdes publicades tla coleziun nöia che é da püch dan man. Le concurs “SCRIBO” é gnü organisé dal’Intendënza y Cultura ladina. Incö él sté l’assessur por la scora y cultura ladina Daniel Alfreider y l’intendënta Edith Ploner che á presenté adöm ala auturia Nadia Rungger y al autur Bruno Maruca la publicaziun nöia.
Nadia Rungger y Bruno Maruca á davagné i pröms dui posć tl concurs leterar tla categoria “junior” cun sües stories “Bon viac” y “New York ne ie mei stada tan ueta”.
L’assessur por la cultura ladina Alfreider á sotligné: “Le concurs leterar é sté öna dles scomenciadies plü interessantes metüdes da jí tl ciamp cultural ti ultims agn. Le grup linguistich ladin é le plü vedl de nosta Provinzia y al fej plajëi odëi che la leteratöra ladina é viá y che al vëgn tres indô docá jones y jogn che á ligrëza da mëte sön papier te so lingaz dla uma sentimënc y emoziuns.” Chësta publicaziun ne porta nia ma pro a aumenté l’oferta leterara ladina, mo rapresentëia ince n contribut a nosc patrimone cultural, insciö Alfreider.
Ince l’Intendënta Edith plone á recordé che chisc proiec “é de gran valur por nosc lingaz de mendranza y che ne á nia na gran leteratöra doia. I oress recordé Elias Canetti che á dit che an é un cun le lingaz dla uma y che an é ci che an tol sö dal lingaz dla uma y che le lingaz é insciö na pert fondamentala dla porsona instëssa.”
L’autur Maruca á splighé che canche al scrî stories, se sëntel plü lëde da lascé jí sü pinsiers. L’auturia jona Rungger á recordé che tla parora “scrì” él laite ince la parora “crì”, y chësc é por ëra n invit da scrí tesć.
Dles 24 operes él 15 tesć che é gnüs mená ite por la categoria “Junior”, resservada a auturies y auturs dai 16 ai 25 agn, y nü tesć por la categoria “Senior”, olache al podô tó pert auturs sura 25 agn.
Tla publicaziun nöia él insciö da ciafé i tesć de Nadia Rungger, Bruno Maruca, Sofia Stuflesser, Iaco Rigo, Samuel Debon, Amir Boucetta, Odette Ploner, Alessia Pordon, Elena Rudiferia, Lisa Verginer, Christa Videsott, Elisa Boi, Samuel Cavanna, Marlies Ellecosta, Sara Moling, Elea Pizzinini, Anna Tavella y Jasmin Triggiano.
Le liber “Scribo” é da ciafé debann tl Istitut Cultural Ladin Micurá de Rü” a San Martin de Tor y te Sëlva, tles redaziuns dla “Usc di Ladins” a Urtijëi, San Martin y La Ila, tles biblioteches de Gherdëna y ince tla Intendënza y cultura Ladina tla Strada Pinter a Balsan y tla sënta da Picolin.
Le proiet é gnü coordiné da Barbara Perathoner. I mëmbri dla iuria é stá Erika Castlunger, Cristina De Grandi, Elisabeth Kostner, Theodor Rifesser y Ingrid Runggaldier, sciöche presidënta.
USP/rc
Galaria dales fotografies
