Atualità
#prömtëmp, Alfreider:“Renforzé l’identité y promöie la cultura ladina”
Le vizepresidënt y assessur ladin Daniel Alfreider á sotrissé pro süa conferënza stampa l’importanza dla scora en presënza. Por le dagní él preoü na paladina digitala nöia por les artistes y artisć.
Promöie la cultura ladina, renforzé l’identité y garantí la scora en presënza: chisc é stá i temesc prinzipai dla conferënza stampa de #prömtëmp dl vizepresidënt y assessur por la cultura ladina Daniel Alfreider ai 27 de agost sön Ju de Frara. Süa vijiun pro le dagní é da anuzé la poscibilité dla digitalisaziun tl ciamp dla cultura ladina y da renforzé l’identité dla comunité ladina. Tl ciamp dla scora é la priorité l’insegnamënt en presënza. Al á tut pert ala conferënza stampa ince l’intendënta ladina Edith Ploner, le diretur dla Repartiziun Aministraziun y Cultura ladina Mathias Stuflesser y le diretur dl Istitut Ladin Micurá de Rü Leander Moroder.
Sistem scolatisch ladin: Scora en presënza
L’assessur á recordé che le svilup dla scora y dla cultura ladina á süa fondamënta iuridica y normativa tl Statut d’Autonomia: “Se basan sön chësta fondamënta él sté meso da garantí n sistem scolastich plurilingual cun na cualité d’insegnamënt alta. Te chësta perioda dl coronavirus él nosc obietif prinzipal chël da garantí l’insegnamënt en presënza tres canche ara vá.” Tl ann de scora rové él sté meso da garantí tles scolines l’assistënza en presënza por le 94 porcënt dl orar preodü, tla scora elementara le 91 porcënt, tla scora mesana le 77 porcënt y tles scores altes le 63 porcënt. “Indöt unse evité tl Südtirol l’ann passé 4.659 caji de carantenes de scolars y scolars cun i conzec di tesc. Sëgn él le focus prinzipal sön les vazinaziuns, insciö Alfreider.
Por garantí posc de laur y oportunité te stüde tles valades él gnü y vëgnel dötaurela modernisé les infrastrotöres scolastiches. Bele rová é i laurs por la scora mesana de Sëlva, le Lizeum d’ert, l’ITE y le convit a Urtijëi y la scolina nöia d’Al Plan. N proiet important por i proscims agn sará le Zënter scolastich nü a La Ila. L’intendënta Ploner á sotligné da süa pert l’importanza de proiec de inrescida por svilupé inant le sistem scolastich y le plurilinguism tle scolines y scores ladines en particolar. “D’atri obietifs por le dagní é da lauré fora n profil por l’Intendënza ladina, da renforzé les competënzes soziales y de autoimprendimënt y da adoré formac nüs tla formaziun dles insegnantes y insegnanc”, insciö Ploner.
Mangé sann, bun y natural tles scolines y scores
N proiet che é gnü metü en pe da pert dl Departimënt adöm ala direziun dles Scolines ladines é le la publicaziun nöia "Mangé sann, bun y natural tles scolines”. Por l’assessur por la scora ladina Daniel Alfreider é “le mangé sann fondamental por le svilup dles mitans y di mituns y de gran valur por döta la familia. De gran valur é ince le svilup dla cosciënza dl'importanza de n'alimentaziun sana y de n past cialt vigni de. Dër prezius é te chësc contest che les mitans y i mituns impares da conësce la produziun locala di alimentars y la regionalité di produc.”
Cultura y Jonëza ladina: Perioda de malsigurté porvia dl coronavirus
Na perioda de malsigurté é gnüda a se le dé dal 2019 inant por la cultura ladina. La defujiun dl coronavirus á archité prësc dötes les manifestaziuns tl monn cultural. Le Departimënt á sostigní les artistes y i artisc y les lies culturales tres contribuc aposta. “Indöt él gnü paié fora cina sëgn 170.000 euro ti agn 2020 y 2021 sciöche sostëgn COVID”, á dit Alfreider. En general él gnü dé arat positif á 340 domandes de contribut da pert dla Cultura ladina dal 2019 al 2021. Le diretur Stuflesser á recordé che al é sté meso da curí les direziuns de dui ofizi che porta para á renforzé la Repartiziun Aministraziun y Cultura ladina. Le diretur Moroder á recordé che l’Istitut é l’istituziun competënta por la normaziun dl ladin. Siöche proiec por le dagní al nominé l’importanza dla realisaziun de dizionars y gramatiches tla forma stampada y online y de sistem de traduziun automatisá porladin. Un di proiec importanc por le dagní é por l’Istitut Ladin l’implemenataziun dl’app esistënta cun dötes les variantes ladines.
Tl ciamp dla jonëza él gnü sostigní la costruziun dla Ütia de Pütia. La Provinzia á ince sostigní tresfora l’ativité dles assoziaziuns Sorvisc ai Jogn y Nëus Jëuni Gherdëina che á organisé por indöt 642 mitans y mituns ativités da d’isté inann.
Proiec por le dagní: Cherta d’identité ladina, cumpëda di grups linguistics, paladina digitala por la cultura
L’assessur Alfreider á spo presenté i proiec por i proscims agn. N obietif important sará na campagna de sensibilisaziun por motivé i ladins da se detlaré ladins pro la cumpëda di grups linguistics de inann por la definiziun dl proporz. “Da chësta cumpëda nen vará de nosta forza al intern dla sozieté dl Südtirol”, insciö Alfreider. N ater proiet é la cherta d’identité ladina cun la definiziun dla pert por ladin che dess tosc ince porté ala contlujiun dla cherta y l’aprovaziun dai ënc competënc.
N’identité sterscia dëida ince da cherié lians de colaboraziun nüs sura i confins fora. “I un renforzé la colaboraziun cun l’Euregio, cun i Comuns de Souramunt y ince tla FUEN orunsé tres de plü presenté nostes ghiranzes sciöche grup linguistich”, á dit Alfreider che á ince dit de orëi renforzé la colaboraziun di Comuns ladins tres la Lia di Comuns ladins.
Por promöie la cultura ladina sides tles valades ladines mo dantadöt ince aldinfora gnarál cherié na paladina digitala nöia por la cultura ladina. “I orun ti pité a nostes artistes y nüsc artisc na spersa digitala, olache ai pó se presenté por ti dé plü visibilité ala cultura ladina che á n valur inestimabl. I messun ester plü capazi de nosta cultura y porté tl monn la belëza y la cualité dla realté culturala ladina”, insciö Alfreider.
Cliché chiló por desciarié la presentaziun.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/rc
