Atualità
Scora ladina: Barat de idees y propostes danter Südtirol y Trentin
Incuntada dl'Intendënta Edith Ploner cun i rapresentanc dla Scora de Fascia por baié dles tematiches dla scora ladina y por renforzé la colaboraziun te chisc seturs.
Barat de idees y propostes de colaboraziun nöies: L’Intendënta Edith Ploner á incunté dan da püch i rapresentanc dla Scora de Fascia a Poza te Fascia. N salüt a Claudio Valentini che lascia süa inciaria de Surastant cun la fin de chësc mëis y n bëgngnü al Surastant nü Federico Corradini, che mët man le laur de responsabl de dötes les scores de Fascia cun l’ann de scora che metará man te n valgügn dis. Ala incuntada ál ince tut pert la responsabla dl sorvisc dla evaluaziun dles scolines y scores ladines Olimpia Rasom.
Tratan l’incuntada él gnü baié de tröc argomënc y al é gnü alzé fora le gran valur dla colaboraziun danter les scores ladines. I dui rapresentanc y sü colaboradus á mostré sö danterater le sistem didatich metü a jí por i studënc y les studëntes che se scrí ite al Ski College y frecuentëia un di trëi lizeums de Fascia (scientifich, artistich y linguistich). En chësc cunt sarál de gran interes da baraté fora idees y esperiënzes cun la seziun sport dl Istitut Technich Economich ITE de Urtijëi, ince pitan le barat de insegnanc y insegnantes o formes de job-shadowing (ospitaziun) danter les döes scores.
L’Intendënta Ploner y le Surastant nü Corradini á fat fora da se incunté sistematicamënter por se confronté sön les strategies didatiches (best practice) che pó daidé deventé dötes les scores ladines plü stersces y atratives. Por chësta rajun sarál tl dagní na majera colaboraziun ince danter insegnanc y insegnantes por conësce plü da daimpró les döes realtés de scora (dala scolina cina ala scora alta) y por imparé un dal ater sciöche an pó svilupé na scora ladina de ezelënza.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/rc
