Atualità
Coronavirus: tesć volontars por mët man l‘ann de scora nü
La Junta provinziala á stabilí incö ai 31 d’agost de plü mosöres de sigurté por les scores y che reverda la gestiun y la prevenziun da Covid-19.
Le presidënt Arno Kompatscher á sotligné incö tratan la conferënza stampa do la sentada dla Junta che “al é nosc obietif da garantí l’insegnamënt en presënza te düc i liví scolastics por döt l’ann”. Por podëi garantí la scora en presënza él nezesciar da analisé la situaziun do la contlujiun dles vacanzes da d’isté. La Junta provinziala á insciö tut la dezijiun da fá n screening tratan les prömes edemes de scora. Al gnará fat tesc nasai aprová dal Stat dui iadi al’edema sön basa volontara.
Le presidënt á fat n apel ales families: “Al é important che i genitrus ti dais la poscibilité ales mitans y ai mituns da fá para. Chësta mosöra garantësc che la scora pois pié ia en sigurté.” Le Südtirol fajará ince para al screening anunzié dal govern statal. Al metará indere pormó man te n valgönes edemes, daimpröma tla Regiun Lazio y spo tles atres Regiuns.
Da indoman 1 de setëmber jará en forza les normes dl regolamënt n. 29
Da indoman 1 de setëmber jará en forza les regoles dl decret 29 che le presidënt a firmé en vëndres ai 27 de lugio. Sön la basa de chësta normes él preodü che dötes les ativités scolastiches y didatiches sides en presënza por l’ann de scora y scolina 2021/22. Les ativités didatiches y curiculares dles Universités gnará ince fates por la plü gran pert en presënza. Al vëgn aconsié le respet dles destanzes de sigurté danter les porsones de almanco un n meter. Al é d’oblianza da se vistí les maschores. Chësta oblianza ne vel nia por mitans y mituns sot ai sis agn o por porsones che ne pó nia les vistí por gaujies de sanité o tratan les ativités sportives.
Zertificaziun vërda por le personal y por i studënc
Cina ai 31 de dezëmber dl 2021 él döt le personal de sorvisc tles istituziuns de formaziun y tles universités y düc i studënc dles universités che mëss avëi para la zertificaziun vërda europeica. Chësta regola vel ince por les scores d’ert, de musiga y de bal y ince por ativités de atres istituziuns de formaziun che fej pert dla université. Sce an ne á nia chësta zertificaziun spo vëgnel conscidré sciöche assënza nia iustificada. Do da cinch dis vëgnel sospenü le raport de laur. Tratan la sospenjiun ne él preodü degun paiamënt. Al ne mëss nia avëi la zertificaziun vërda düc chi che á na zerificaziun de esenziun dala vacinaziun aladô dla zircolara dl Ministere dla Sanité. Te chisc caji vëgnel aconsié da fá regolarmënter tesc de identificaziun dl coronavirus.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/mpi/gst/ma
