Atualità
Suramunt tl’Euregio, Alfreider: „Vare important por la colaboraziun”
I Comuns ladins de Suramunt é ince comëmbri dl Consëi di Comuns dl’Euregio. Por l’assessur Alfreider e chësc n segnal important por renforzé la colaboraziun interladina.
Pro le pröm De di Comuns dl’Euregio è gnü a se le dé inier ai 30 de setëmber a Hall tl Tirol. En chësta ocajiun él i consorc di Comuns dl Tirol, Südtirol y Trentin che á amplié sües formes de colaboraziun sura i confins fora. Tl cheder dl De di Comuns dl’Euregio él ince gnü istituí le pröm Consë di Comuns dl’Euregio cun cinch comëmbri por le Tirol, cinch por le Südtirol, cinch por le Trentin y un n rapresentant ince por i trëi Comuns ladins de Suramunt. Tl 1923 él rové i trëi comuns de Ampëz, Col y Fodom pro la Provinzia de Belun y insciö él gnü despartí i ladins.
Por le vizepresidënt ladin Daniel Alfreider é la partezipaziun cun un n comëmber tl Consëi di Comuns dl’Euregio por Suramunt n vare important por renforzé la colaboraziun al intern dla comunité ladina. “Al é n segnal important por colaboré sura i confins fora te n contest europeich. A chësta moda sunse bugn da porté inant nostes ghiranzes cun n pëis maiú”, insciö Alfreider.
Le rapresentant di trëi Comuns de Suramunt é le diretur dl Istitut Cultural Ladin “Cesa de Jan” Denni Dorigo. Un di compic prinzipai dl Consëi di Comuns dl’Euregio é de aconsié i presidënc dles Provinzies dl Südtirol, dl Tirol y dl Trentin che chestiuns che reverda dötes les materies dl’Euregio che atoca i comuns te na manira particolara.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/rc
