Atualità
Co jí inant do la scora mesana?
Informaziun sön l’oferta formativa ampla dles scores altes ladines.
Tosc se ruvará indô la scora mesana y tröpes scolares y tröc scolars se damanará: co vara pa inant cun mi stüdi? Tröc sá avisa te ci scora che ai ó jí, mo d’atri á ciamó dübi sön ci direziun che ai ó tó y te ci scora alta che ai dess se scrí ite. Chësta plata ó informé scolars, scolares y geniturs sura l’oferta formativa dles scores altes ladines y dé n aiüt concret ales mitans y ai mituns dles terzes classes dla scora mesana che mëss se chirí fora na scora alta o profescionala, por daidé te chësta dezijiun tan importanta por le dagní de nüsc jogn y de nostes jones.
Por gauja dla pandemia Covid-19 nes porta ince l’ann de scora 2021/22 tresfora desfides nöies y nia saurides. Danter ater ne pó ince en chësc ann les scores altes nia mëte a jí i dis de informaziun y dla porta daverta che é tres stá ti agn passá na buna ocajiun por se informé diretamënter tles scores sura les ofertes formatives esistëntes.
Porchël oress l’Intendënza ladina recordé te chësta manira l’oferta formativa che vëgn pitada dales scores altes ladines y dala scora profescionala por l’artejanat da Urtijëi. Chëstes scores garantësc na buna formaziun te ciamps desvalis, pita azënc inovatifs tla didatica y ti dá ales studëntes y ai studënc ladins la poscibilité da jí inant cun suzes sön so tru formatif tl sistem scolastich paritetich y plurilinguistich.
Sön la scheda d'infromaziun ciafëise na lista de dötes les scores altes ladines cun referimënc a sües seziuns y a sü azënc particolars. Tres i links dá dant rovëise diretamënter sön la plata internet de vigni scora alta, olache i ciafarëis deplü informaziuns monüdes sura les singoles ofertes de formaziun.
Istitut Tecnich Economich "Raetia": www.iteraetia.it
Scores altes "La Ila": www.ll-itc-laila.it
Lizeum d'ert y scora profescionala por l'artejanat artistich "Cademia": www.cademia.it
Clican chiló röiun ala verjiun originala dl comunicat stampa por visualisé imajes, documënc o video che taca lapró
