Atualità
Plann nazional PNRR: 20 miliuns de euro por l’atrativité di paisc
Cina ai 21 de forá pó i Comuns dl Südtirol presenté proiec por revalorisé n paisc o n post storich. La Junta provinziala chiriará fora un n proiet da presenté por le finaziamënt.
Le Plann nazional por jí inant y se refá (PNRR: Piano Nazionale di Ripresa e Resilienza) vëiga danfora fonds por finanzié proiec por che paisc manaciá dal despopolamënt y posc storics pois se trá sö economicamënter y sozialmënter. Ara se trata dl’Aziun A dla Mosöra 2.1 tl setur dl turism y dla cultura denominada "Attrattività dei borghi". Por vignun de chisc proiec mët le Ministere dla Cultura a desposiziun 20 miliuns de euro y chësc fej fora indöt 420 miliuns de euro.
Proiec de revitalisaziun por n post d’importanza storica
Por chirí fora ince te nosta provinzia n post che podess ciafé chëstes ressurses á la Junta provinziala aprové ai 11 de jená la publicaziun de n avis publich ai Comuns dla provinzia por che ai pois manifesté so interes da tó pert ala seleziun de n proiet pilot por la revalorisaziun culturala, soziala y economica de paisc o posc che manacia da gní arbandoná o che é bele gnüs arbandoná. Cina ai 21 de forá dl 2022 pó i Comuns porté dant so proiet. La Comisciun de valutaziun di proiec é insediada tla Repartiziun Cultura todëscia y ara é metüda adöm da trëi porsones en rapresentanza dles trëi Repartiziuns provinziales por la Cultura y da trëi porsones che rapresentëia le Consorz di Comuns. La Comisciun ti fajará spo ala Provinzia la proposta dl proiet da presenté al Ministere dla Cultura cina ai 15 de merz dl 2022. L’avis publich ti gnará mené ai 116 Comuns de nosta provinzia y publiché sön les plates internet dla Provinzia.
Propostes de proiet da presenté cina ai 21 de forá
Cun la deliberaziun da incö surantol la Provinzia ince les diretives nazionales por la valutaziun di proiec. Sön la basa de chisc criters ará i proiec finanziá na funziun fondamentala por trá indô sö dal punt de odüda cultural, sozial y economich posc storics o paisc manaciá dal arbandon. Ara se trata de paisc che se mirita da gní sostignis porvia de süa storia y cultura, che pó ester d’ejëmpl por i raiuns incëria. Le fin dla mosöra dl PNRR é chël da fá n intervënt por recuperé le patrimone architetonich, cultural y ambiental a na moda da renforzé l’atrativité de de pici paisc, posc y zëntri storics, ciaran da restauré y mantigní lercs urbanes, frabicac storics o culturai y ince elemënc che fej pert dl’identité. Al é na strategia che fej pert di obietifs por n svilup sostignibl dl’Ajënda 2030.
Proposta dl Südtirol da ti presenté cina ai 15 de merz al Ministere dla Cultura
La Junta provinziala á inciarié le diretur dla Repartiziun Cultura todëscia,Volker Klotz, da nominé i sis componënc dla Comisciun che valutará i proiec portá dant y chiriará fora chël da ti presenté ala Junta proviziala che menará spo inant a Roma le proiet selezioné por nosta provinzia. Al gnará dantadöt tut en conscidraziun aspec sciöche l’ocupaziun jonila, le lian cun la popolaziun dl post, l’atrativité abitativa y les mosöres infrastrotorales, strotorales y digitales.
Investiziuns dal PNRR ince por de mëndri proiec
L'assa de finanziamënt dl PNRR "Attrattività dei borghi" vëiga ciamó danfora na secunda mosöra: tl cheder dl’Aziun B pó i Comuns ti presenté diretamënter al Ministere dla Cultura, tres cina ai 15 de merz dl 2022, la domanda de finanziamënt por de pici proiec cina a 1,6 miliuns de euro. L'Aziun B lascia pro le finanziamënt de de plü proiec.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/sf
