Atualità
Regolamënt nü por les relevaziuns tles scores todësces y ladines
La Junta provinziala á approve le regolamënt nü por valuté i liví de aprendimënt dles scolares y di scolars tles scores ladines y todësces dl Südtirol.
L’organisaziun de relevaziuns de aprendimënt periodiches tles scores é n recuisit fondamental por sostigní i ejams finai tles scores mesanes y altes y implü él ince n stromënt prezius por mosoré l’efiziënza dl sistem de formaziun y de istruziun. Tl Südtirol sarál les scores ladines y todësces che podará s’anuzé tl dagní de n regolamënt nü por mosoré te na forma permanënta l’atuaziun dles relevaziuns dles competënzes arjuntes tles scores. Chësta dezijiun é gnüda tuta tla sentada dla Junta provinziala al 1 de forá sön proposta di assessurs Daniel Alfreider y Philipp Achammer.
I assessurs Alfreider y Achammer sotlignëia che “tl Südtirol pó les scores talianes ti jí do ales diretives statales, indere por chëres ladines y todësces él sté nezesciar da integré la diretiva tignin cunt dles carateristiches linguistiches y culturales desfarëntes. Da sëgn inant podará les scores ladines y todësces fá referimënt a n regolamënt tler por fá les analises.”
Sön la basa de chësc passaje aministratif podará les direziuns scolastiches ladines y todësces sotescrí convenziuns nöies cun INVALSI y d’atres istituziuns o organisaziuns te chësc ciamp. La responsabla dl Sorvisc Evaluaziun dles scores ladines Olimpia Rasom sotlignëia che insciö sarál poscibl da garantí n monitoraje scientifich dles relevaziuns tl dagní. “Dal atra pert podaran ti dé na majera conscideraziun y n majer respet al plurilinguism dl sistem y dla porsona, ince porvia dla ritmisaziun dles proes ti dui lingac y cun la poscibilité da chirí fora le lingaz de n valgönes proes.”
Le Sorvisc Evaluaziun dles scores ladines laurará fora sëgn adöm ales istituziuns competënzes mosöres ajuntives por integré les relevaziuns tl insegnamënt scolastich.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/tl/rc
