Atualità
“Sprachen im Vergleich”: presentaziun de n laur de plü co 20 agn
L 17 de ma él gnü presenté la gramatica comparativa “Sprachen im Vergleich. Deutsch-Ladinisch-Italienisch” de Peter Gallmann, Heidi Siller-Runggaldier y Horst Sitta (mort tl 2020).
La publicaziun é gnüda a se le dé cun la colaboraziun de Carla Festi, dla université da Desproch, Marco Forni, dl Istitut ladin Micurá de Rü, y Giovanni Mischí, dl Ciamp pedagogich dl’Intendënza ladina.
Ara se trata dl V° volum de n’opera imponënta, metüda man ti prüms agn 2000, che s’á tut dant da ti dé na descriziun sistematica al lingaz ladin, tles variantes gherdëina y badiota, confronté cun le lingaz todësch y talian. Ti cater volums da denant êl bel gnü dant la descriziun dl verb, di pronoms, dla frasa scëmpla y dla frasa complesa. Sëgn unse dan man la descriziun dl sostantif, dl agetif, dl averb, dla proposiziun y dla congiunziun, dagnora te na comparaziun danter le todësch, le talian y le ladin dla Val Badia y chël de Gherdëna.
La presentaziun
Ala presentaziun tla scora mesana de Sëlva êl presënc i majeri esponënc dla scora y cultura ladina y dl’université. L’Assessur por la Formaziun y Cultura Ladina Daniel Alfreider, á sotrissé l’importanza dles operes scrites por ladin por n popul zënza n majer stat de referimënt y che vigni publicaziun sön le lingaz ladin á n gran valur da trasmëte ince inant.
L’intendënta Edith Ploner á sotrissé l’importanza dla comparaziun danter i lingac sciöche metodologia adatada por les scolines y scores ladines, por chëra che na gramatica comparativa á n gran valur.
La presentaziun dl’opera é gnüda fata dala professuria Heidi Siller-Runggaldier dl’université da Desproch che á mostré sö cun ejëmpli concrec l’opera de gran archirida linguistica. Ara á sotrissé le valur dl lingaz ladin sciöche pice lingaz, che á la medema dignité y le medemo valur sciöche i atri dui majeri, adöm cun n plurilinguism dala scolina insö sciöche n privilegh de nostes valades. Valur ala publicaziun ti á ince dé le professur Paul Videsott, degan dla Facolté de sciënzes dla formaziun da Porsenú, che á detlaré l’opera de importanza ince por la formaziun dles insegnantes y di insegnanc ladins.
La presentaziun é gnüda moderada dala direturia dl Ciamp pedagogich Maria Kostner.
N’opera de valüta scientifica y culturala
„Sprachen im Vergleich“ é n’opera de gran valüta scientifica, che é stada buna da fotografé dër avisa le comportamënt dl lingaz ladin aldedaincö. Ara nes dá n cheder monü y fedel dles dinamiches che governëia nosc lingaz, a vigni livel gramatical, y ti á dé gran dignité ales inrescides linguistiches ladines, meton - por le prüm iade te na forma tan sistematica - söl medemo livel ladin, todësch y talian.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/nst
