Atualità
De dla scora ladina
A La Ila s’á incö tigní le „De dla scora ladina” – apuntamënt tradizional cun chël che al pëia ia ufizialmënter l’ann de scora nü.
Ala presënza dl assessur ala Formaziun y Cultura ladina, de düta la Dirigënza dla scora ladina (cun rapresentanc dla scora todëscia y taliana dla Provinzia) él ruvé adüm defata 300 insegnanc y insegnantes, por aldí n salüt de incorajamënt y na aodanza de bun ann de scora.
Te so intervënt, á l’assessur dit fora süa speranza che an pois indô pié ia cun crëta y entusiasm, do i agn problematics condizioná dal Covid. Al á sotrissé l’importanza che le Secundo Statut de autonomia (de chël che al gnará chisc dis recordé i 50 agn) á albü por la scora paritetica ladina, y al se tól dant da se dé jö cun la digitalisaziun tles scores y cun le svilup sostignibl. Al á spo rengrazié dütes les componëntes dl sistem scolastich y ti á auguré n ann rich de sodesfaziuns.
Ince l’intendënta ales scores ladines, Edith Ploner, á saludé i presënc y ti á dé inant zacotan de “parores clé” cun chëres che al foss da se dé jö tratan chësc ann de scora: individualisaziun, personalisaziun, chirí talënc y coraje.
Tl zënter dla manifestaziun él gnü metü l’intervënt dla prof. Concetta Tino, chëra che á baié de “Prepararsi al futuro: soft skills e didattica innovativa per fronteggiare le sfide della digitalizzazione e del cambiamento”. Na relaziun bindebo articolada, te chëra che al é gnü alzé fora la nezescité, da pert dla scora, da ti dé a mituns y mitans i strumënc che ai adora por afronté les sfides che chësta sozieté ti mët dant. I jogn dess imparé de se orienté te nosc contest sozio-economich, cultural y digital.
Dedô él sté na mësa torona cun rapresentanc desvalies dl monn dla scora: l’ispetur Albert Videsott, le diretur Heinz Videsott, l’insegnanta Monika Senoner, la rapresentanta dla consulta di geniturs Silvia Delago, le rapresentant dla consulta di studënc Martin Putzer. Al è gnü fora tler l’invit da ciaré inant cun crëta, da ti jí incuntra ai mudamënc dla scora zënza tëma, deache mituns y mitans, insegnanc y insegnantes á ressorese assá.
Denant co stlü jö, él ciamó gnü saludé y rengrazié personalmënter les insegnantes y l’insegnant che vá en ponsiun cun incö: Rosmarie Bacher, Hanele Ploner , Verena Niederegger, Alessandra Zardo, Emanuela Wanker, Rita Konrater, Edith Trebo y Norbert Insam.
Bela y aprijada la cornisc musicala pitada dala Scora de Musiga Badia, y dër aprijada ince la conduziun di trëi studënc Matthias Frenademetz, Lucia Pizzinini y Julian Costa.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/san
