Atualità
Ann de scora nü tles scores ladines
Por indüt 2944 scolari y scolares tles scores ladines, incumá ai 5 de setëmber l´ann de scora nü.
Por 1084 mituns y mitans, jogn y jones dles scores ladines dla Val Badia, y 1225 dles scores de Gherdëna, mët man ai 5 de setëmber n ann de scora nü. 635 é i pici scric ite tles scolines dles döes valades. Tles scores ladines, incumá, él indüt 2944 scolari y scolares.
Por l’ocajiun oress l’Assessur provinzial ala Formaziun y Cultura ladina y l’Intendënta ales scores ladines Edith Ploner ti auguré n bun y bel laur a döt le monn dla scora: dirigënc y dirigëntes, insegnanc y insegnantes, maestri y maestres, scolari y scolares, personal aministratif, geniturs y families.
Por l’Assessur “él dër important rové tosc indô tla normalité dles condiziuns de insegnamënt, y che la scora ladina pois ciaré inant cun crëta, idealism y partezipaziun. Da pert dl’aministraziun provinziala gnarál metü l’azënt söla digitalisaziun y söl svilup sostenibl.”
L’Intendënta sotrissëia “la valüta dla individualisaziun y dla personalisaziun dl insegnamënt, y ara s’aoda che al vëgnes laoré tres deplü te chësta direziun. Al é da avëi coraje da porvé fora metodologies nöies y ciamps interdisciplinars.”
Bel da atira podará düc jí te classa zënza mascherot. La segurté y le bëgnester de scolari y scolares ti stá dër a cör al’aministraziun provinziala. Avisa porchël, giulan a n proiet pilot dl’Eurac da Balsan, á metü man - de forá 2022 - le control dla cualité dl’aria tles scolines y tles scores ladines dla Provinzia, chëres che á ciafé 251 aparac por mosoré les variaziuns de CO2 tles classes, y podëi insciö ince arbassé le risch da se taché le virus Covid19. Les mosoraziuns, che jará inant ince ti proscimi mëisc, á cina sëgn mostré sö resultac che dá confort, n cunt de cualité dl’aria tles scolines y scores ladines.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
