Atualità
Presenté codejl sön la Scola ladina y l Segondo Statut de autonomia
Èl gnü presenté le codejl “La Scola ladina y i 50 ani dl Segondo Statut de autonomia” che l’Intendënza ladina à metü adüm, en gaujiun di 50 agn dl Secunt Statut de autonomia.
A Santa Cristina, dan da na bona compëda de publich (danter i atri, êl presënc i umbolc di trëi comuns de Gherdëna, zacotan de assessurs, dirigëntes scolastiches y deplü insegnanc y insegnantes) él gnü presenté le codejl: "La Scola ladina y i 50 ani dl Segondo Statut de autonomia" che l’Intendënza ladina à metü adüm, en gaujiun di 50 agn dl Secunt Statut de autonomia.
L’incuntada é gnüda daurida dal intervënt dl assessur ala Formaziun y Cultura ladina che é jü ite söla valüta dla publicaziun y söl’importanza che le Statut de autonomia à por düta la popolaziun de Südtirol. "La sconanza normativa, i traverc economics, soziai y culurai di ladins ne pó nia gnì aratà normai, dà y basta. La scora é üna dles istituziuns plü importantes, y al ê dërt pié ia da chilò, por conscidré i gragn vari che ara à podü fà, giulan ala autonomia. La memoria y la cosciënza mëss gnì zidlades, y ince l’impëgn por mantignì y milioré le Statut mëss gnì renové", á dit l'assessur.
Dedô él sté l’Intendënta ales Scores ladines, Edith Ploner, che é jüda ite söles sfides che la scora mëss tignì ite aldedaincö: danter i traverc che les scores ladines se mët dant, él le bëgnester fisch y psicologich de mituns y mitans, la digitalisaziun acompagnada da na dërta pedagogia informatica, le milioramënt dl rendimënt olache al é loces de aprendimënt, aumenté la cualifica de insegnanc y insegnantes, milioré la colaboraziun cun les families y le teritore, mantignì les scores altes tles valades, cherié na miù cuntinuité danter i livì de aprendimënt y ciarè da ti garantì la miù formaziun poscibla ai scolari y ales scolares.
Cun sëns critich à spo Emanuel Demetz y Simon Kostner presenté so scketch (dui reflesciun y trëi matades) che rodâ incër la perzeziun che la jënt à dl Statut de autonomia. Ai à recordé n valgügn traverc arjunc da giulan al Statut, y à fat damat sön val’ desfarënzia danter badioc y gherdënes, rovan ala conclujiun che al ti convëgn a düc da tignì adüm, y da se recordé di vantaji che l’autonomia ti garantësc ai ladins.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/san
