Atualità
Ok al percurs de abilitazion per l personal nseniant
La furmazion di nsenianc tl Südtirol vën slargeda ora: la Jonta provinziela à dat pro l percurs de abilitazion per l personal nseniant dla scoles prufesciuneles.
La suplëntes y i suplënc cun laurea che nsënia te na scola prufesciunela ladina o tudëscia tl Südtirol à da sën inant la puscibltà de arjonjer l’abilitazion per nsenië tres n curs de furmazion de doi ani y nsci de giapé daldò na stiera de rodul. "Cun chësc curs de furmazion nuef dla Facultà de Scienzes dla Furmazion dl’Università liedia de Bulsan se nuzons de nosta autonomia y adatons la furmazion dl personal nseniant dla scoles prufesciuneles a chëla dla scoles autes", auza ora l assessëur Philipp Achammer. “L fin ie chël de ti dé al personal nseniant la puscibltà de planifiché si daunì y de ti garantì na cërta segurëza“, nsci l assessëur provinziel.
L percurs de abilitazion
Sun si pruposta à la Jonta provinziela ncuei (22 de nuvëmber) giaurì la streda al “percurs de abilitazion per l personal nseniant dla scoles prufesciuneles tudësces y ladines dla Provinzia“. Ntan l curs de furmazion, che vën a se l dé paralelamënter al nseniamënt, mpera i partezipanc y la partezipantes cumpetënzes pedagogiches y didatiches. Ala fin dl curs ti vëniel sëurandata l’abilitazion per nsenië. La furmazion de doi ani cun referimënt pratich tol ite plu o manco 1000 ëures, per arjonjer nsci 24 ponc universiteres. Mplu possa l personal nseniant dla scoles prufesciuneles che à i drë tituli de azes ala tlasses de cuncors dla scoles stateles giapé l’abilitazion per tramedoi sistems scolastics.
Liam strënt danter teoria y pratica
L cunzet per l percurs de abilitazion ie unì metù ju dala Ntendënza tudëscia y dala Ntendënza ladina n culaburazion cun la Facultà de Scienzes dla Furmazion dl’Università de Bulsan. L fin dl percurs ie chël de nsenië ju “prufesciunisc che pënsa do sun la basa de n gran savëi pratich te si materia y de n cumpurtamënt urientà ala nrescida“ dij Anna Pfitscher, dirijënta dla Ntendënza tudëscia che ti ie stata do al proiet. Per chësta rejon ie la teoria y la scienza liedes a na maniera strënta cun la pratica. L ie nce udui dant modui pratics sun la particulariteies dla scola dl Südtirol. La furmazion vën a se l dé n pert deberieda – per cie che reverda i aspec didatics – y n pert te grupes spezialisedes. Ntan l percurs de abilitazion vën la partezipantes y i partezipanc acumpaniei da n mentor o na mentora.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/usp
