Atualità
I ladins de Souramont tl zënter dla juebia culturela dla Euregio
Dan n gran publich ie l raion ladin de Souramont chëst’ ena passeda stata tl zënter dla juebia culturela dla Euregio tla Waaghaus a Bulsan.
Gran nteres per la storia dla valedes de Souramont à l publich mustrà n juebia sëira (ai 19 de jené) pra la juebia culturela dla Europaregion Tirol-Südtirol-Trentin: Dan avisa 100 ani, ai 21 de jené 1923 ova l guviern fascist cumandà l’agregazion furzeda di trëi chemuns ladins de Souramont (Ampëz, Fodom y Col) tla Provinzia de Belun do che i fova dant stac per seculi pert dl Tirol storich. De chësta storia iela jita pra l’ultima juebia culturela tl ciulé straplën dla cësa dla pëisa (Waaghaus) a Bulsan.
La Secretera generela dla Euregio Marilena Defrancesco à saludà i trueps nteressei, danter l auter nce l Diretëur dl Istitut Cultural Ladin Cesa de Jan de Col, Denni Dorigo. L avenimënt de gran fazion dla spartizion dla valedes de Souramont dal Tirol storich ie unì tematisà te na letura szenica de tesc storics y contemporeres de trëi ëiles de Souramont furnides cun l guant tradiziunel. La manifestazion ie unida acumpanieda dal ensemble "Kropya".
La scumenciadiva dla juebies cultureles dla Euregio ie unida metuda a jì dan n ann dala Europaregion Tirol-Südtirol-Trentin y dala lia cultuerela "Waag": uni terza juebia dl mëns iel tla cësa Waaghaus a Bulsan sun l program devertimënt, workshops y ucajions per se cunëscer danter persones adultes y mëndri. N juebia, ai 9 de fauré 2023, uniral tenì la proscima juebia culturela dla Euregio.
Clican chiló röiun ala verjiun originala dl comunicat stampa por visualisé imajes, documënc o video che taca lapró
