Atualità
Plü educaziun fisica tles scores: n proiet pilot piará ia da d’altonn
Por dui agn alalungia, y a livel de sperimentaziun, gnarál metü lapró ores de educaziun fisica tles scores primares. Por Alfreider se tratera da promöie le svilup di mituns y dles mitans.
Te n valgünes scores primares dla Val Badia y de Gherdëna, a mët man dal ann che vëgn, gnará les ores de educaziun fisica aumentades. Chësta é na dezijiun che la Junta provinziala á tut l’edema da denant. "I orun a chësta moda dé na resposta al debojëgn de movimënt di mituns, y promöie so svilup meton averda al bëgnester psicologich y sozial" dij l’assessur provinzial ala Formaziun y Cultura ladina, Daniel Alfreider. Alfreider sotrissëia che l’educaziun fisica porta pro da fá ativités sportives deboriada y porta milioramënc tla conzentraziun y tles ativités dl pinsier.
Tl concret, ará i mituns tuc ite tl proiet döes ores de educaziun fisica al’edema implü. L’intendënta ales scores y scolines ladines dl Südtirol, Edith Ploner, do avëi consulté les direziuns scolastiches, dijará – tres decret – ci direziuns y ci istituc che tolará pert al proiet pilot.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
