Atualità
Liëndes ladines patrimone cultural UNESCO: definida la prozedöra
Les liëndes ladines dess deventé patrimone cultural UNESCO. I assessurs Alfreider y Vallazza á presenté a San Martin de Tor le percurs de candidatöra adöm al Prof. Petrillo (Unitelma Roma).
Tla sënta dl Museum Ladin, a Ciastel de Tor de San Martin, s’á incö i rapresentanc dles istituziuns ladines, dles uniuns culturales, y deplü porsones interessades, incunté cun le prof. Pier Luigi Petrillo, titolar dla cattedra Unesco tl’univerité Unitelma de Roma, chël che é rové adalerch por ilustré le proiet de candidatöra dles liëndes ladines a patrimone cultural imaterial dl Unesco. Giulan al interessamënt dl assessur provinzial por la Formaziun y Cultura ladina, Daniel Alfreider, y dl assessur regional ales mendranzes ladina, mochena y zimbra, Manfred Vallazza, él gnü garantí le sostëgn finanziar da pert dla Regiun Trentin-Südtirol, y an á podü chirí fora – tres na inrescida de marcé – l’université de Roma sciöch’ istituziun che coordinará y portará inant l’iter de candidatöra, che dess se stlü jö ala fin dl 2024.
Te süa relaziun á le prof. Petrillo recordé cai che é i criters che l’Unesco mët dant y che an mëss tigní ite (aladô dla Convenziun de Paris dl 2003), al á splighe sciöche le percurs se desfira, y dit ci che al vá debojëgn da sëgn inant por arjunje le travert.
Le pröm vare da fá é chël dla creaziun de n archif digital dl patrimone cultural imaterial, por chël che an adora testemonianzes dla vitalité y dla produtivité culturala dles liëndes de nüsc raiuns ladins: tl ciamp dla leteratöra, dl ert figurativa, dla musiga, dl imaginar coletif y insciö inant.
Te so intervënt á l’assessur Alfreider dit fora süa sodesfaziun por la scomenciadia, cun la speranza che al pois rové inant tres deplü, danter la comunité ladina, le messaje che la cultura é veramënter val’ de important, y che les liëndes alda da gní valorisades. Al á sotrissé le fat che döta la comunité culturala laora, da sëgn inant, por le medemo obietif.
Por l’assessur regional Vallazza ne é les dificoltés de candidatöra nia n tema: la jënt ladina á les capacités da jí tres y da se fá avarëi por ci che ara á de bel y de bun.
Döt le publich á spo albü la poscibilité da dí la süa, y da se mëte a desposiziun por colaboré te chësc percurs lunch, nia saurí, mo emozionant.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/cs
