Atualità
Istitut ladin Micurá de Rü, finanzieda l’atività culturela 2024
La Jonta provinziela à deliberà n vënderdi ai 9 de fauré l’asseniazion finanziera dl Istitut Culturel Ladin Micurá de Rü per mëter a jì si ativiteies cultureles y per l manejamënt dla furmazion 2024.
L Istitut culturel ladin Micurá de Rü mët a jì y sustën scumenciadives per l mantenimënt y la prumuzion dla rujeneda y dla cultura ladina. Dlongia la publicazions – per ladin o dates ora te d’autra rujenedes – che à da n fé cun l raion, ie na pert mpurtanta dl Istitut chëla de sustenì la lies cultureles.
La Jonta provinziela de Bulsan à deliberà n vënderdi ai 9 de fauré l’asseniazion finanziera per mëter a jì si ativiteies cultureles y per l manejamënt dla furmazion 2024. La soma che ie unida data pro ie de 381 mila euro, ulache l ie laite i 63 mile euro sëuraprò permez ala previjions de bilanz. Coche ënt strumentel dla Provinzia Autonoma de Bulsan vën l Istitut finanzià n pert dala Provinzia, per l’autra pert se finanziéiel tres ntredes che l vën a s’l dé tres libri vendui y servijes pitei, coche traduzions tl ladin gherdëina y badiot dal tudësch y dal talian.
"Ti proscimi mënsc laurerons per la digitalisazion per l svilup sëuraprò de n diziuner online y l renfurzamënt dl’identità dla cumenanza ladina. La finamira ie chëla de garantì upurtuniteies per l daunì ala mendranza ladina, a si cultura y a si rujeneda", à dit l assessëur per la Istruzion y Cultura Ladina Daniel Alfreider.
L Istitut à scumencià ufizialmënter cun si atività tl 1977 coche zënter de cumpetënza dla Jonta provinziela, danter l auter per normé l ladin scrit tla Val Badia y Gherdëina. Danter l’autra finaliteies iel nce l stude a livel scientifich dla rujeneda, dla storia y dla cultura ladina n cunlaurazion cun universiteies y istituc naziunei y da oradecà, n cuoperazion cun d’autra lies cultureles y la sburdla per rujené y scrì tla rujeneda ladina tla scoles di luesc ladins cun l sustëni dl Departimënt Istruzion, Furmazion y Cultura Ladina.
"L Istitut Micurá de Rü fej prumuzion per la cunescënza dla cultura ladina y juda pea per mantenì y svilupé la rujeneda scrita y a usc tres i mesuns de nfurmazion y la realisazion, la divulgazion y vendan publicazions linguistiches y cultureles. L urganisea manifestazions y cursc de furmazion. L sustëni istituziunel ie de mpurtanza fundamentela per l vester identiter-storich-culturel di ladins dla Dolomites", à dit Edith Ploner coche reprejentanta dl Departimënt Istruzion, Furmazion y Cultura Ladina.
Nfurmazions plu avisa n con’ dl Istitut Micurá de Rü y dla publicazions di diziuneres bilinguai, dl sistem de cumedura (cunlià y ntegrà tl diziuner online), dla gramatica ladina y di cursc de rujeneda iel da giaté tla plata web dl Istitut www.micura.it.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/an/dl
