Atualità
ITE Urtijëi cun azënt sun l sport: Jonta provinziela auza i cuntribuc
Aldò de na delibera dla Jonta provinziela vëniel auzà la soma che vën paieda ora per uni sculé y uni sculea dl ITE Raetia de Urtijëi cun azënt sun l sport.
Tla senteda di 16 de auril à la Jonta provinziela deliberà de auzé la soma che vën paieda ora per uni sculé y uni sculea dl ITE Raetia de Urtijëi cun azënt sun l sport.
"L vën ratà che l vede debujën de balanzé ora y auzé l cuntribut che vën paià ora per uni sculé y uni sculea", sotrissea per la scola di luesc ladins l assessëur cumpetënt Daniel Alfreider: "Chësc adeguamënt vën a s’l dé da una na pert ajache dal 2018 incà iel uni ann deplù iscrizions; ntlëuta fòvel unì valivà ora i criteres per i cuntribuc. Dal’autra pert iel unì auzà l cuntribut ajache la situazion economica se à mudà, dantaldut per gauja dla nflazion y cun ëila nce i priejes plu auc tl sport da d’inviern."
"Per la planificazion da pert dl ITE Raetia iel mpurtant che n posse giapé l finanziamënt tres n cuntribut urdiner, per ne depënder nia uni ann da n cuntribut straurdiner", da coche auza ora la Ntendënta Edith Ploner: "On na gran legrëza per i bon resultac arjonc tl sport da pert de plu sculées y sculeies dl ITE Raetia de Urtijëi."
I cuntribuc ne fova nia unii auzei dal 2014 incà y l semea vester l bujën de sustenì sun mesura la tlasses dal sport dl ITE Raetia tres n finanziamënt urdiner per ti vester da ann a ann ai custimënc, danter l auter per tò a fit i purtoies
Sezion dal sport cun n cunzet de urganisazion nuef
La Sezion dal Sport dl ITE Raetia de Urtijëi – che se tlama ntant ufizialmënter Ski College – chirerà per l cunzet urganisatif nuef oradechël la cunlaurazion ativa cun duta la lies dal sport dla valeda, per nvië via bele l ann de scola 2024/2025 cun na nuvità: per jëunes y jëuni dla lies che fej pea pra l pruiet iel l mesun fé doi iedesc al’ena alenamënt cun si lia, bele danmesdì, zënza che l vënie tralascià la pert de furmazion de scola.
"Tl sport avisa sciche tla furmazion uelel vester mpëni y na finamira for tlera dan ai uedli, per ruvé te travert. Ulon nscila ti dé ala jëunes y ai jëuni che fej sport l mesun de mëter adum miec furmazion y sport", sotrissea l assessëur provinziel Daniel Alfreider.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/mac/dl
