Atualità
Fotos dla arpejon de trëi generazions: da sëurandé a Südtirol
L’arpejon de si uem, l fotograf Stefano Zardini, y de si peresc - 120 ani de storia dla Ladinia – uel Valentina Zardini ti sëurandé ala Provinzia de Bulsan. L assessëur Alfreider l’à ancunteda.
Milesc y milesc de fotografies, nia urdinedes, conta stories dantaldut dla Ladinia ti 120 ani passei. Valentina Zardini, vëidua dl fotograf cunesciù Stefano Zardini de Cortina, à tëut su cuntat cun l assessëur provinziel ladin Daniel Alfreider, per ti pité l’arpejon de fotografies de si uem y de si antenac – trëi generazions de fotografs – che ti unissa sëurandata ala Provinzia de Bulsan. N lunesc ai 16 de lugio à Alfreider ancuntà Valentina Zardini a Cortina. Werner Pescosta dl Istitut Culturel Ladin, la diretëura dl Museum Ladin Katharina Moling y Carlo Suani à acumpanià l assessëur pra chësta ancunteda, per ti cialé al material fotografich y l valuté deberieda,
"L se trata de n bën culturel de gran valor dla storia cuntempurana, cun truepa stories de valuta de truep dejeneies che vën cuntedes tres chisc pultrec,” dij l assessëur provinziel Daniel Alfreider. Danz che chësta stories ne n’ie nia urdinedes y muessa perchël unì valutedes da esperc, per unì pona cataloghisedes y digitalisedes, a na moda che les posse unì ududes da n publich lerch. La vëidua dl fotograf Zardini ulëssa arjonjer chësc travert. Perchël ti àla pità ai vijitadëures de Bulsan de ti sëurandé duta l’arpejon ala Provinzia de Bulsan, coche scincunda, se damandan na sëula garanzia, chëla de ti mustré la fotografies a plu jënt che la va.
“L ie dessegur n gran lëur che se damanda truep tëmp. Valuton iusta de azeté la uferta per ti sëurandé dut cant al Istitut Culturel Ladin Micurá de Rü cun la ncëria de nventarisé la fotografies y les njenië ca, a na maniera che les posse unì metudes ora tl Museum Ladin de San Martin de Tor, “dij Alfreider. Tla proscima enes saràl mo ancuntedes per valuté sce l sibe mesun mëter n droa chël che la vëidua Zardini se mbincia.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/uli/dl
