Atualità
Renfurzé la scoles de Südtirol te si pluralità
L ie unì renfurzà i sistems de sustëni y la cuoperazion, y nscila uel i trëi assessëures y la direzions de furmazion sustenì sculeies y nsenianc.
De ndut 74.576 sculées y sculeies ie tl ann de scola 2023/2024 jic te na scola elementera, mesana o prufesciunela: 53.477 te na scola tudëscia, 18.777 te na scola taliana y 2.353 te na ladina. Chësta cumpëides ie unides prejentedes n lunesc ai 22 de lugio a Bulsan da pert de chiche à la respunsabltà per la scola ladina, taliana y tudëscia (l Ufize stampa provinziel USP à bele repurtà). N uel vester na scola per duc, mantenì valores y tradizion y tl medemo mumënt garantì n svilup sun mesura di tëmps y la scunanza dla rujeneda ladina, da coche l assessëur Daniel Alfreider à auzà ora: "Nëus jiron inant tl nvestì te nosta ravises cultureles y linguistiches." Chësc possa unì fat tres na majera vijibltà, ma nce tres n slargiamënt dla dunfierta de furmazion. "La reflescion tresora ie mpurtanta, ajache ntlëuta vëniel ntraudù ulache l ie l bujën dl svilup furmatif. Sce n tol ite duc i atëures dl ciamp de furmazion y dl raion sons boni de arjonjer de bon resultac per duc", à sotrissà la diretëura dla furmazion ladina Edith Ploner, che à oradechël auzà ora che la scola dla valedes ladines de Südtirol lëura pea bën deberieda cun l’autra doi direzions de scola, danter l auter pra l manejamënt de pruiec coche LISE.
Scola tudëscia: valurisé sistems de sustëni, per garantì la pluralità
La scola te Südtirol desmostra na topografia lergia de formes y tipologies de scola, da coche à cuntà l assessëur Philipp Achammer: "Ti ani passei ons renfurzà la udleda ala persunalità di mutons y di jëuni y slargià ora la dunfierta furmativa: dut l sistem de sustëni ie unì valurisà, cieche se desmostra nce tl persunal." L diretëur furmatif Gustav Tschenett à fat referimënt ala dunfierta furmativa elaureda per i nsenianc y l mesun de fé uspitazion dedora dala Talia te Europa: "65 nseniantes y nseniac de duc i ciamps possa nscila mparé a cunëscer n sistem de scola nuef y nce se udëi ora i vantajes dla situazions de curnisc de si sistem."
Furmazion taliana: ti dé na sburdla ala cuoperazion tl raion
L assessëur provinziel Marco Galateo à dit che l bilanz dl ann de scola passà ie bon. N uel inant ti dé na sburdla y slargé ora la cuoperazions bele desmustredes cun partners raiunei. Na gran legrëza iel coche i ie unii recunesciui a livel statel ntier: "Nosc pruiet anti-mobbing, BattBull, dëssa ntant nce unì sëurantëut per dut l raion statel," da coche se ncunforta Galateo. La direzion de scola taliana uel jì inant sun la streda bele nvieda via, mé per dì tres chël che l vënie laurà ora y metù n droa d’autri prutocoi de cunvenzion, coche à dit l seurantëndent Vincenzo Gullotta.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/ck
