Atualità
Direziun Provinziala Scolines y Scores ladines: Prozedöra de nomina
Cun la fin d'agost vá en ponsiun Edith Ploner, la titolara atuala. An pó se candidé incina ales 12:00 dl 23 de agost 2024.
Cun la fin d’agost él l’atuala Direturia Provinziala dles Scolines y Scores Ladines y Intendënta dles scores ladines, Edith Ploner che vá en ponsiun. La seziun ladina dl Consëi scolastich provinzial s’á incunté por definí la prozedöra de nomina por la Direziun Provinziala Scolines y Scores Ladines che eserzitëia ince les funziuns dl’Intendënza ladina. An pó se candidé incina ales 12:00 dl 23 de agost 2024.
Tla sentada di 2 de agost 2024 á la seziun ladina dl Consëi scolastich provinzial definí la prozedöra por la nomina dla direturia nöia o dl diretur nü dla Direziun Provinziala Scolines y Scores Ladines por les scores ladines, aladô dles normes varëntes.
La prozedöra preodüda dal art. 19 dl Statut de autonomia cun integraziuns tl D.P.R 89/83, D.L. 434/1996 y dla L.P. n. 6/2022 vëiga danfora na nomina fora de na terna proponüda dala seziun ladina dl Consëi scolastich provinzial. Les persones mëss gní da grups profescionai definís, y mëss avëi i recuisic por ocupé n post dirigenzial de pröma categoria.
La prozedöra plü menüda concordada da chësc gremium tla sentada di 02 de agost dl 2024, vëiga danfora la poscibilité de fá domandes de candidatöra da pert dles porsones interessades cun i recuisic damaná incina al plü tert les 12:00 dl 23 de agost 2024, ala misciun e-mail dl secretariat dl Consëi scolastich provinzial: repartiziun-scola-cultura-ladina@provinz.bz.it, deboriada cun na fotocopia dla cherta d’identite, tres PEC: repartiziun-scola-cultura-ladina@pec.prov.bz.it o ince gní dades jö tl secretariat dal repartiziun Scora y cultura ladina tla strada Binder 29 a Balsan. Ala domanda ti mëssel gní injunté n curriculum vitae profescionala.
Les candidates y candidac mëss detlaré i recuisic y les cualifiches, sciöche odü dant dala norma de atuaziun D.P.R. 89/1983, D.L. 434/1996 y dala L.P. n. 6/2022. Le formular por fá la domanda é da ciafé sön la plata dl’Intendënza ladina.
La seziun ladina se abinará ai 27 de agost dales 13:00, olache al gnará tigní les audiziuns por verifiché i recuisic dles candidates y di candidac. Les candidates y i candidac ará la poscibilité da se presenté y porté dant sües vijiuns.Le dovëi dla seziun ladina dl Consëi scolastich provinzial é chëra da lité y ti propone 3 porsones ala Junta provinziala, che chiriará fora danter chëstes la porsona plü adatada por curí chësta inciaria. Do avëi aldí le Minister dla Istruziun a Roma nominará la Junta provinziala l’Intendënt nü/l’Intendënta nöia.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
