Atualità
Scolina: iscriziuns online tardies dai 20 ai 22 d’agost
La poscibilité, resservada ai mituns y ales mitans che complësc trëi agn cina ai 31 de dezëmber dl 2024, ti conzedará da jí ala scolina bele pian ia dal proscimo mëis de setëmber.
Balsan/Bulsan (USP). La Direziun provinziala Scolines y Scores ladines lascia alsavëi che dai 20 ai 22 d’agost dl 2024 jarára da scrí ite dopormez ma online i mituns y les mitans ala scolina por l’ann scolastich 2024/2025.
Les iscriziuns tardies podará ma gní fates tla forma telematica tres le portal dla Provinzia "IOLE". La Direziun provinziala Scolines y Scores ladines segnalëia ince che an ti röia ma pormez al sorvisc, che é ma atif te chësc tëmp, tres le SPID, la CIE o la cherta di sorvisc (da ativé debann te n comun dl Südtirol), porchël vál debojëgn da avëi o le SPID, o la cherta d’identité eletronica o la cherta di sorvisc.
Por podëi jí ala scolina vál debojëgn da avëi ademplí le dovëi de variora aladô dl decret lege n. 73 del 07.06.2017 (link estern).
Por l'iscriziun te na scolina de n ater comun dla provinzia vál debojëgn da fá l'iscriziun online tla scolina de portignënza y spo da presenté la domanda de trasferimënt sön papier tla sënta de portignënza ti tëmps dá dant por les iscriziuns.
Les porsones che eserzitëia la responsabilité genitoriala, che trasferësc la residënza tl Südtirol do le termin d’iscriziun y che n’á porchël nia dé jö la domanda d’iscriziun cina ai 17 de jená dl 2024, pó dé jö te vigni momënt la domanda d’iscriziun sön papier tla sënta de portignënza, sciöche preodü dala Delibera della Giunta Provinciale nr. 869 del 10/11/2020 (link estern).
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
