Atualità
Direzion Scoles ladines: l Cunsëi scolastich formulea i trëi inuemes
L sarà la Jonta provinziela a crì ora la intendënta nueva/l intendënt nuef dla scoles di luesc ladins sun la fundamënta de na pruposta de trëi inuemes formuleda dal Cunsëi scolastich provinziel
BULSAN/BALSAN (USP). Ncuei, ai 17 setëmber, à la sezion ladina dl Cunsëi scolastich provinziel numinà la trëi candidates/i trëi candidac danter chëles/chëi che la Jonta provinziela chirerà ora la diretëura/l diretëur che sarà a cë dla Direzion provinziela Scolines y Scoles ladines. La pruposta de trëi inuemes ie metuda adum da: la diretëura dl Raion pedagogich dla Direzion Istruzion, Furmazion y Cultura ladina, Maria Kostner, l diretëur dla Repartizion Aministrazion scola y cultura ladina, Mathias Stuflesser y l diretëur dla direzion raionela de Al Plan, Heinrich Videsott.
La pruzedura de numinazion dla Intendënta nueva/dl Intendënt nuef per la scoles de uni orden y degré di luesc ladins ie reguleda dal Statut de Autonomia (art. 19) y dal regulamënt de atuazion (D.P.R. 89/83): la Jonta provinziela stabilësc chi che messerà mené la Direzion provinziela Scolines y Scoles ladines sun la fundamënta dla pruposta de trëi inuemes apurveda dala sezion ladina dl Cunsëi scolastich provinziel. Oradechël iel, per crì ora la intendënta nueva/l intendënt nuef per la scoles de uni orden y degré di luesc ladins, de ublianza che la Jonta provinziela se damande l arat dl Ministere dla Istruzion y dl Merit.
La persones nteressedes à abù dl’aurela nchin ai 23 d’agost de prejenté si candidatura per la curida dla stiera de dirigënza dla Direzion provinziela Scolines y Scoles ladines. De ndut iel unì ite cin candidatures de chëles che uniuna ova i recuisic d’azes. Una/Un dla cin candidates/di cin candidac se à trat de reviers.
Ncuei domesdì se à la cater candidates/i cater candidac prejentà ala cumëmbres/ai cumëmbri dla sezion ladina dl Cunsëi scolastich provinziel. La cumëmbres/I cumëmbri 9 che à l dërt de vela dla sezion ladina dl Cunsëi scolastich provinziel à pudù lité per al plu doi candidates/candidac. La trëi candidates/I trëi candidac ie pona numinei sun la basa di resultac dla vela. L Cunsëi scolastich provinziel dla sezion ladina à lità l diretëur dla direzion raionela de Al Plan, Heinrich Videsott (cun 7 ujes), la diretëura dl Raion pedagogich dla Direzion Istruzion, Furmazion y Cultura ladina, Maria Kostner (cun 3ujes) y l diretëur dla Repartizion Aministrazion scola y cultura ladina, Mathias Stuflesser (cun 1 usc).
Do che la dezijion dl Cunsëi scolastich sarà unida furmaliseda numinerà la Jonta provinziela – do avëi audì l arat dl Ministere dla Istruzion y dl Merit – na persona a cë dla Direzion provinziela Scolines y Scoles ladines.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
