Atualità
Inuvazion y cuer: la Nteligënza Artefiziela Emutiva per l Daunì
L pruiet "Robotics Emphatic Intelligence" mët adum tecnologia y nteligënza emutiva, y l gëura nscila sëides nueves per la robotica umanistica, se davanian recunescimënc nternaziunei.
BALSAN/BULSAN (USP). L pruiet "Robotics Emphatic Intelligence REI" ie unì purtà inant dai studënc Elisa Aricó, Augusto Bruno Martino, Noah Perli, Arianna Marrone, Maximilian Ilias y Elia Vismara tl Lizeum Rainerum. Si finamira ie de svilupé na generazion nueva de robot che sibe bona de nteragì te na maniera empatica cun la jënt. Chësta finamira nueva uel l team REI arjonjer se nuzan dla nteligënza artefiziela dl livel plu aut che l ie ntant y studian la emuzions umanes. L pruiet ie nstadì unì premià cun la bedaia de bront pra na cumpetizion nternaziunela ti USA y ie zënzauter n var inant senificatif tl ciamp dla robotica emutiva.
Marco Galateo, vizepresidënt dla Provinzia Autonoma de Bulsan, à dit che “chësta jëunes y chisc jëuni à desmustrà coche la tecnologia posse propi fé ora la desferënzia, nia mé per si efiziënza ma nce per si umanità. Vincenzo Gullotta, un di prumutëures dl pruiet, à njuntà: “Sustenion nosc studënc, sustenion la ezelënzes, te chësc cajo à na reprejentanza di studënc dl Rainerum arjont resultac propi scialdi boni nce te n valgun campiunac nternaziunei.”
Noah Perli, che à dat n cuntribut atif per svilupé la software, à detlarà: “L nost ie n robot empatich, l ie bon de recunëscer la emuzions che vën ora da nëus y cun si uedli iel bon de ti jì do a nosc mus, nes dajan nscila la mprescion che l nes scote veramënter su. De gra a n prugram nstalà iel bon de recunëscer la emuzions che la persona à iusta, calculan i muvimënc dl mus, di uedli, dl nes y dla bocia.” Don Paolo de Cillia, diretëur dl Istitut, à dit de vester scialdi stolz per coche i studënc ie unii trac ite y à fat pea: “L pest y i recunescimënc che chisc jëuni giapa ie l recunescimënt dl lëur de truep nsenianc che se dà ju uni di cun l’educazion y la furmazion per l daunì dla jëunes y di jëuni, bele tla scola mesana y pona nce ti cin’ ani de scola auta.”
Elisa Aricó à ënghe rujenà dla mpurtanza dl’esperienza che ie unida ora da chësc pruiet: “Me tole pea na gran legrëza y cuntentëza, truep savëi nuef, ajache é mparà propi truepa cosses nueves che ne me ësse mei nmaginà de pudëi n iede unì a nriescer.” Bruno Bertotto, derijënt dl Departimënt de nteligënza artefiziela dla scola, à sotrissà: “L me fej dassënn plajëi, son stolz de lauré cun i jëuni, dantaldut per l ntujiasm che vëije canche i scumëncia a lauré pra n pruiet te chël che ëi ie i prims a crëier.”
Augusto Bruno Martino, ideatëur dl pruiet, à cuntà coche chësc team che à venciù ie unit a s’l dé: “Tl prim fovi da sëul, laurove uni domesdì, nchin che me é rendù cont che ove debujën de zachei che me judëssa. Nscila ons laurà inant, ie y n auter jëunn, udan pona ite che l manciova mo for zachei che nes judëssa, y nscila ti ons damandà ai autri cater de nes judé a finé unian ite te nosc team. Stefano Monfalcon, diretëur dl Lizeum, à spiegà la mpurtanza dla cunlaurazion y dla nteligënza artefiziela tl pruiet: “I jëuni à do na lingia de sperimentazions tëut la dezijion de mëter ite la nteligënza artefiziela te n robot umanoid per fé a na maniera che la nterazion simuleda sibe empatica. La nteligënza artefiziela recunësc la esprescion, cudifican na resposta empatica y dajan pona da ntënder si empatia tres si uedli.”
L pruiet "Robotics Emphatic Intelligence" ne n’ie nia mé na avanverdia tecnologica, la desmostra nce coche na educazion sun mesura, sota y inuvativa posse fé che n abine soluzions che ie bones de mëter adum l prugres tecnologich y la sensibltà umana.
La paroles de Marco Galateo y Vincenzo Gullotta auza ora a puntin l spirt de chësta scumenciadiva: n maridoz danter nteligënza artefiziela y cuer uman, per n miëur daunì.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/dl
