Atualità
Camp de dlaziologia: "N’esperienza unica y de gran valor persunel"
La formes de cuntreda y de vita ntëur i dlacieres fova l pont zentrel dl camp de dlaziologia de chëst’ann sun la Franzenshöhe dlongia l Ortler.
"Nëus son duc da stramp cuntënc y recunescënc per avëi pudù tò pert a tan n bel proiet. L ie propi stat na esperienza unica y de gran valor persunel", nsci la sculées y i sculeies ala fin dl camp de chëst’ann. Dai 16 ai 21 de setëmber se à i sculeies y la sculées dat ju cun la tematiches dla geologia, biologia y ecologia sun l jëuf de Stilfs. L camp ie unì metù a jì dal Ciamp Pedagogich dla Ntendënzes tudësces y ladines n culaburazion cun doi scoles autes de Würzburg tres n proiet Erasmus+ y l sustëni de Europafels.
N culaburazion cun espertes y esperc de ciamps de lëur defrënc iel unì fat jites, workshops y referac sun l tema formes de cuntredes y de vita ti raions da mont alauta y sun la cunseguënzes de gran proiec te chisc luesc. Se stizan sun n proiet nventà de na furnadoia che purtëssa nfin su sun l jëuf de Stilfs, à la jëunes y i jëuni analisà criters defrënc che muessa unì tëuc n cunscidrazion pra tel gra proiec: l nflus sun l’aria, l fonz, l’eghes, duta la cuntreda, la formes de vita y la fuera che vën fata. Per pudëi valuté te na maniera sceria l pro y l contra de n tel proiet, à la sculées y i sculeies fat nrescides cunscidran i argumënc desvalives y fajan truepa descuscions sotes te de pitla grupes. Ala fin iesi unì a una de refudé n tel proiet te na cuntreda sensibla de n parch nazionel purtan prupostes alternatives per n turism modern y che cëla sun la sustenibltà. N’esperienza particulera ie pona stata chëla de jì su sun la piza dl dlacier dl Sulden cun l’acumpaniamënt di mëinacrëp. Na sculea: “L ie na esperienza particulera ruvé sun n dlacier, n ruva a si lims: la mont nes à nsenià truep nce sun nëus nstësc”.
L camp ie pensà per sculées y sculeies dla ultima tlasses dla scoles autes nteressei ala scienzes natureles y nce coche urientamënt per se crì ora n lëur o n stude. Chëst’ann fova leprò doi sculeies dl Lizeum d’Ert Cademia de Urtijëi.
L’ativiteies dl camp ie unides acumpaniedes dai nsenianc Katrin Nietzold y Christian Kohl de Würzburg, dai referënc Lukas Neuwirth, Christian Aspmair y Astrid Ferrari, da Guido Caracristi y Susanne Hellrigl dl ciamp pedagogich dla Ntendënza tudëscia y da Petra Senoner dl ciamp pedagogich dla Ntendënza ladina.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red/ps
