Atualità
Premiaziun dl Concurs de leteratöra ladina “Auturs ladins scrî …”
L’Assessorat provinzial por la cultura ladina inviëia en vëndres, ai 9 de messè 2004, düć i interessá ala premiaziun di davagnadus dla pröma ediziun dl concurs leterar ladin “Auturs ladins scrì …”, Maria Pedevilla de La Plì de Mareo y Ivan Senoner de Urtijëi.
Le pest, ala süa pröma ediziun, é gnü scrit fora dal Govern de Südtirol – Assessorat provinzial por la Cultura Ladina sön scomenciadia dl Assessur ladin Florian Mussner. Le fin dl concurs é la promoziun dl lingaz ladin tles sües variantes dla Val Badia y de Gherdëna y suradöt de stimulé i jogn a se dè jö cun la scritöra dl lingaz dla uma.La iuria, mëtüda adöm da Brunamaria Dal Lago Veneri (presidënta), Edi Crazzolara, Maria Cristina Senoner y Luis Mahlknecht, à tut la dezijiun de dè le pröm pest ex aequo a Maria Pedevilla da La Plì de Mareo cun la cuntia „En amur imposcibl – Na storia desco en atra“ y a Ivan Senoner de Urtijëi cun la cuntia „La ueia de pië via”.
La manifestaziun mët man dales ot dassëra (20.00) tla ostaria “Gran Ćiasa” a La Pli y é daverta a düć i amisc dla leteratöra ladina. La premiaziun vëgn acompagnada cun la musiga de Andrè Schuen y Manuel Chizzali.
I media é invià a to pert y de informè sön la premiaziun,
che vëgn tignida,
en vëndres, ai 9 de messè dales ot dassëra (20.00)
tla ostaria “Gran Ćiasa” a La Pli.
USP
