Atualità
Premiaziun dla pröma ediziun dl concurs leterar ladin
OSP - En vëindres, ai 9 de messè 2004 tl’ostaria “Gran Ciasa” a La Plì de Mareo, él gnü premié i davagnadus dla pröma ediziun dl concurs leteral ladin “Auturs ladins scrî…”. Maria Pedevilla da La Plì de Mareo cun le roman “ En amur imposcibl – Na storia desco en atra” y Ivan Senoner da Urtijëi cun le roman “La ueia de pië via” é i dui premià.
Le concurs leterar é nasciü sön scomenciadia dl Assessur ladin Florian Mussner cun le fin dla promoziun dl lingaz ladin scrit, te sües variantes dla Val Badia y de Gherdëna. Te so salüt à l’assessur sotligné l’importanza de chësc concurs por la popolaziun. “Operes leterares é por le lingaz y la cultura ladina le pan por suravire te n tëmp de globalisaziun,” insciö Mussner.Les döes stories premiades é publicades tl liber “Auturs ladins scrî...2004”, prejentè en chësta ocajiun. Dala premiaziun à l’assessur ladin ringrazié dötes les porsones che à contribuì al’organisaziun dl concurs y ala realisaziun dl liber, impormeton so sostëgn por la continuité dl concurs leterar ladin.
Inće l’ombolt dl comun de Mareo, Albert Palfrader à evidenzié l’importanza di concursc leterai por nosc lingaz dla uma, speran inće de na repetiziun.
La presidënta dla iuria, Brunamaria Dal Lago Veneri à azentè l’importanza di concursc leterai por i lingać de mendranza. “Al concurs à tut pert porsones de vigni eté cun de bunes capazitês d’espresciun leterara. De vigni sort de tematiches dla sozieté atuala, moderna é sta i contegnüs dles operes prejentades”, insciö la presidënta.
Do la surandada dl pest de 2.500,00 Euro da pert dl Assessur Mussner, à i dui premià, sön invit de Alexander Prinoth, diretur dla ripartiziun scora y cultura ladina, lit dant val’ pinsiers fora de sües operes.
Le liber “Auturs ladins scrî…2004” é da ćiafè debann, tl’ofize por la scora y cultura ladina a Balsan, Bindergasse 29, numer de telefonn 0471/417020 o 0471/417011.
OSP
