Atualità
Dé dla cultura ladina ai 22 d’otober
USP - Por le secundo iade vëgnel tignì en vëndres, ai 22 d’otober 2004 le “Dé dla cultura ladina”. Le fin de chësta manifestaziun é chël d’alzè fora tematiches che reverda la mendranza ladina mo che po ince ester d’interès por i atri grups linguistics. L’argomënt de chësc ann é la “Storia dla scora ladina tl tëmp dan y do les Gran Veres”. La manifestaziun vëgn organisada dal Assessorat provinzial por la cultura ladina. Ala manifestaziun tolarà ince pert le Presidënt dla provinzia Luis Durnwalder, l’ Assessur por la scora y cultura ladina, Florian Mussner, l’ Assessuria por la cultura todëscia, Sabina Kasslatter Mur y l’ Assessur por la cultura taliana, Luigi Cigolla.
La storia dla scora ladina respidlëia la situaziun politica tla Val Badia y te Gherdëna tl tëmp do la Secunda Vera dl monn. La popolaziun se dejidrâ na scora por mantignì le lingaz dla uma mo sambëgn inće por imparè i atri dui lingac baià te Südtirol; la scora ess messü ester n lian sterch danter les döes valades ladines y le rest de Südtirol. An se damanâ ćiun che foss stè le dër model de scora por i Ladins. Le fin de chësc convëgn é chël de porvè da stlarì chësta chestiun da n punt de odüda storich.L’incuntada che vëgn tignida en vëndres, ai 22 d’otober 2004, dales 9.00 inant a Balsan, tl Palaz provinzial nr. I vëiga danfora chësc program:
Dales 9.00: Scomenciamënt cun salüt y presentaziun cörta da pert dl diretur dla Repartiziun Cultura Alexander Prinoth.
Dales 9.10: Salüt dl Presidënt dla Provinzia, Luis Durnwalder, dl Assessur por la cultura ladina, Florian Mussner, dl’Assessuria por la cultura todëscia, Sabine Kasslatter–Mur y dl Assessur por la cultura taliana, Luigi Cigolla.
Dales 9.45: Scomenciamënt di referać:
- Rainer Seberich: “Les rajuns storiches y politiches dla scora tles valades ladines.”
- Josef Fontana: “Le strit dla scora te Gherdëna y tla Val Badia.”
- Franz Vittur: “La scora ladina ti agn dal 1940 al 1950: na scora nöia fej sü pröms vari.”
- Franz Sottara: “La posiziun dla dlijia tla chestiun dla scora ladina dan y do la Secunda Gran Vera”
- Roland Verra: “Le plurilinguism intercultural dla scora ladina.”
L’incuntada é daverta a dötes les porsones interessades.
I rapresentanć di massmedia é dër bel invià a reportè y documentè chësta manifestaziun ti folieć, tl radio y tla televijiun.
SAN
