Atualità
L’artista Barbara Tavella mët fora sües operes
USP - Barbara Tavella, la pröma artista che à davagné le pest „Flus d’aisciöda“, mët fora sües operes tla Galaria Prisma a Balsan. La mostra gnarà inaudada en vëndres sëra, ai 4 de forà 2005 y restarà daverta cina ai 19 de forà.
Le fin dl concurs „Flus d’aisciöda“, metü a jì dal Assessorat ala cultura ladina l’ann passè, é chël de sostignì y incorajè artistes y artisć jogn. Pert dl pest ê inće na mostra aposta propi por presentè les operes a n publicum plü ampl . La comisciun dl concurs à dantadöt amiré les operes de Barbara Tavella, che à davagné le pest, por sü laûrs artistics realisà cun l’aiüt di mesums nüs. L’artista é nasciüda tl 1972 tla Val Badia y à studié pitöra al’Academia artistica Brera a Milan. Al dedaincö vìrera y laórera a La Ila. Te sües operes adora Barbara Tavella tröp i mesums nüs sciöche la fotografia y le computer. Y propi so “realism fotografich” ti à portè tröc punć pro le concurs. Tl’instalaziun video da odëi pro la mostra a Balsan vëgnel fora, te na manira ćiamò plü tlera y complessa, chësc jüch alternè danter realté y finziun. I dessëgns descrî na condiziun de sospenjiun danter n sonn cun i edli daverć, na rapresentaziun de dejidêrs, recorć y realté. Al ne vëgn nia metü en scena aziuns che contëgn strotöres naratives. Cun sües imajes singules che se möi, ti va Barbara Tavella dlungia a ći che é sot l’esteriorité dles cosses. La mostra vëgn inaugurada en vëndres, ai 4 de forà 2005 dal assessur ladin Florian Mussner, dala presidënta dla Lia di artisć de Südtirol Helga von Aufschnaiter y dal presidënt dla iuria Josef Irsara. Letizia Ragaglia acompagnarà les porsones presëntes tres la mostra.I massmedia é dër bel invià
a tó pert al’inauguraziun dla mostra d’ert
en vëndres, ai 4 de forà 2005, dales 19.00
tla Galaria Prisma, strada Weggenstein 12, a Balsan
y a reportè dla daurida dla mostra.
USP
