Atualità
L’assessur Mussner al festival di cors tla Svizra rumancia
USP - Pro le „Festival da Chors“ che gnarà tignì en domënia, ai 10 d’aurì a Rueun tla Svizra rumancia saràl presënt ince l’assessur ala cultura Florian Mussner. Chësta manifestaziun vëgn metüda a jì tl cheder dla colaboraziun danter i Ladins de Südtirol y i Retoromans dl ciantun Grijun. I cors ladins gnarà rapresentà dal cor dles ëres „Raiëta“ da La Val.
L’assessur ladin Florian Mussner tolarà pert en domënia al Raiffeisen-„Festival da Chors“ organisé dala „Radio e Televisiun Rumantscha „ y dala „Lia Rumantscha“. Ara se trata de na incuntada de cors te n’atmosfera daverta y lëdia zënza valutaziun da pert de porsones espertes. Al sarà le publicum presënt che tolarà la dezijiun ći grup che se cualifichëia por jì inant. La finala gnarà tignida ai 29 de mà 2005 a Turic y gnarà trasmetüda live sön le SF1. A Rueun gnarà Südtirol rapresentè dal cor dles ëres „Raiëta“. De chësc cor, che é stè metü sö tl 1990, fêjel pert 27 ćiantarines danter 13 y 65 agn. L’inom dl cor “Raiëta” fej referimënt ales liëndes de Fanes. Te chëstes liëndes é la “Raiëta“ la pera slominënta che cun co lominus arjunj i cörs dles porsones y iradiëia spirit de vita. Le cor “Raiëta” ćianta feter döt por ladin. Pro le festival ćiantaràl indöt trëi ćianties, döes de chëstes é ćianties ladines originales. Tla roda preliminara messarà le cor se mosoré cun trëi d’atri cors y plü avisa cun le „Chor d’affons Cuschnaus“, le „Chor viril Ligia Grischa“ y le „Ils emigrants“.USP
