Atualità

USP - N barat de esperienza y de ideies n cont dla furmazion: chësc ie stat l argumënt zentrel dl’ancunteda dl minister belga Oliver Paasch cun i assessëures Provinziei Florian Mussner y Sabina Kasslatter Mur (inier) ai 12 de jené a Bulsan.

USP – Mudazions y nuviteies che la reforma dla scoles autes porta tla valedes ladines unirà prejentedes te cater manifestazions. La prima scumëncia l’ena che vën te Sëlva y a Urtijëi, pona jirala inant a La Ila y a S.Martin de Tor.

USP – A scumenciamënt dl’ultima ena de jené, dai 24 ai 26, uniral tla scolines de Gherdëina y dla Val Badia tëut su l’iscrizions per l ann de scolina 2011-2012. I plu pitli che possa unì scric ite ala scolina tla valedes muessa cumplì 3 ani nchin ala fin de fauré 2012.

USP – Do che la Jonta provinziela à dat pro la reforma dla scola auta, aspieten te chësc mumënt l bënsté dl minister per l’istruzion a Roma, dan che la possa jì n drova. Acioche i sculeies y si genitores sebe cie che l sarà dan nuef, iel unì metù on line na plata internet dedicheda. Leprò nce la verscion per ladin.

USP - Cun l proscimo ann de scola uniral nce tla valedes ladines metù n drova la reforma dla scola auta. L plann teritoriel cun la vela de furmazion per i sculeies ladins, la mpartizion dla direzions y la ndicazions provinzieles dates pro dala Jonta provinziela ie nucei (14 dezëmber) unides prejentedes te na cunferëza stampa a Bulsan. “L sistem de scola paritetich y la rujenedes resta nce tl daunì l pont de forza dla scoles autes ladines”, nsci l assessëur Florian Mussner. Trëi direzions dla scoles autes a Urtijëi ie unides unifichedes ta na sëula direzion. La Jonta provinziela à dat pro la segonda ëura de ladin de ublianza per la scoles autes ladines.

USP – Ncuei (13 dezëmber) à la Jonta provinziela dat pro la reforma dla scola auta, duman merdi uniral prejentà la nfurmazions plu avisa. Dut chësc te na cunferënza stampa cun i assessëures ala scola Florian Mussner, Sabina Kasslatter Mur y Christian Tommasini.

USP – Sensibilisazion de viers de prudoc biologics: chësc ie la mira dl program per l crëscer y viver de prudoc bio che (ncuei) ai 13 de dezëmber ie unì azetà dla Jonta provinziela. L program dëssa unì metù n drova nchin de lugio de n auter ann.

USP – La reforma dla scola auta per la trëi grupes de rujeneda ie (ncuei) ai 13 de dezëmber stat l argumënt zentrel dla senteda dla Jonta provinziela. Tla cunferënza stampa à l presidënt dla Jonta provinziela nce nunzià vel mudazions n cont dl plann de spartizion y la ndicazions provinzieles ie nce unides tratedes spezificamënter per la scoles autes ladines. Cun l ann de scola nuef uniral te duta la scoles autes ladines tenì doi ëura de Ladin.

USP – La Cunsulta provinziela ladina à dat pro l’ultima pert di cuntribuc da chëst ann per mantenì la cultura ladina. Lies, artisc’ y istituzions che lëura y cura la Cultura ladina giapa tres l Assessorat ladin dla Provinzia de Bulsan de ndut 1.238.697 euro. La spartizion de chisc cuntribuc ie dassënn granda.

USP – L cunzert d’Avënt ciantà y sunà da ladins tl Dom de Bulsan, à nsnuet (10 dezëmber) pità mumënc alternatives al gran busiamënt cumerziel dla zità. L publich che à respundù te na gran cumpëida al nvit dl Assessorat provinziel ladin à ancuntà i ladins mparan a cunëscer si cultura musichela de viver l avënt.