Atualità

Cun la reforma dl marcé dl laur (Jobs Act) dl govern Renzi mëss ince la Provinzia de Balsan se fistidié por atué n valgönes mudaziuns che reverda l’ordinamënt dl lernerat. Le dessëgn de lege é gnü aprové dala Junta provinziala: al é preodü na norma ad hoc por garantí l’ejam de maturité al intern dla formaziun duala.

La Junta provinziala á aprové incö (al 1. de merz) le program 2016 por l’inrescida y l’inovaziun. Le budget dla Repartiziun inovaziun, inrescida y université é de 134 miliuns de euro. Al pó ti rové pormez al sostëgn finanziar ënc de inrescida, impreses o proiec de cooperaziun danter aziëndes.

L’assistënza sanitara di ghesć dles residënzes por seniors tl Südtirol gnará miorada tres na presënza costanta y strotorada de doturs: chësc é l’obietif prinzipal dla delibera aproada incö (al pröm de merz) dala Junta provinziala. Aladô dles dimenjiuns dla strotöra ará i seniors n’assistënza cun dai dui ai cinch doturs de medejina generala.

L’analisa scientifica di produc „made in Südtirol“ sará le compit prinzipal dl laboratore sensorial nü dla Laimburg. La Junta provinziala ti á dé incö süa aprovaziun al program volumetrich dl laboratore che ará na spëisa de 600mile euro y che gnará cofinanzié tres le FESR. L’assessur Schuler á presenté la proposta.

Incö (al pröm de merz) á la Junta provinziala dit de sce ala stipolaziun de na convenziun cun la Rëi dla ferata taliana RFI (Rete Ferroviaria Italiana Spa) por jí inant cun la realisaziun de proiec de mioramënt dla mobilité dles rodes tres trus dles rodes nüs dlungia les linies dla ferata.

Acumpanië y alesiré la ntegrazion tla scoles y scolines ladines cun cunsëies y nfurmazions d’utl: chësc ie l fin de doi brosciures nueves svilupedes dal Serivisc per la Consulënza psicopedagogica y per la ntegrazion dla Ntendënza ladina per i genitores cun n background de migrazion y per l personal didatich/pedagogich. La brosciures nueves unirà presentedes ai 07/03 a Al Plan y ai 09/03 a Urtijëi.

Vigni mëis él l’Euregio che presentëia sön süa plata web na personalité, n lüch y na chestiun iuridica che reverda döt le raiun dl’Euregio. Chësc mëis é dediché a Gina Streit che coordinëia i proiec Interreg tl Tirol y al Museum archeologich dl Südtirol cun Ötzi. Implü rajona Peter Gamper dla Repartiziun Europa söi programs nüs de Interreg 2014-2020.

Ince chësc ann ará i mituns y les mitans danter i 10 y i 11 agn la poscibilité da tó pert ai cursc de „Junior ranger di parcs naturai“, na scomenciadia che vëgn metüda a jí chësc ann tl Parch natural Fanes-Senes-Braies a Al Plan de Mareo. Da indoman (01 de merz) pon se scrí ite.

La colaboraziun danter le Südtirol y le Tirol, tl setur dla mobilité, reverda en gran pert i coliamënc transfrontaliers. Y ara mëss le fá tres deplü, dantadöt te na perioda storica te chëra al vëgn indô rajoné de barieres ai confins. Sön chësc é a öna i assessurs provinziai Florian Mussner y Ingrid Felipe che s’á incunté incö (25 de forá) a Desproch.

I assessurs provinziai Philipp Achammer y Florian Mussner á presenté incö ai 24 de forá tratan na conferënza stampa tla sënta dl Sorvisc ai Jogn de Balsan i punc plü importanc di planns anuai por la promoziun di mituns y jogn di grups de lingaz ladin y todësch. La Junta á aprové da püch les döes deliberes.