Atualità
-
Euregio unida: al Prener mosöres de transiziun y limitades tl tëmp
Les mosöres de control spezifiches sön le Prener messará avëi n carater straordinar, transitore y limité tl tëmp: chësc é chël che i presidënc Arno Kompatscher, Ugo Rossi y Günther Platter ti damana ala Talia y al’Austria cun na deliberaziun y reuniun incö (ai 15 de forá) a Balsan dl GECT Euregio. Incuntades preodüdes ince a Viena y Roma.
-
Roland Verra espert dl mëis sön Mercator, rëi d'archirida europeica
La promoziun di lingac de mendranza te contesć de plurilinguism é un di obietifs primars dla rëi d’archirida “Mercator”, la organisaziun dles scores de mendranza por cunt dl’Uniun Europeica. La plataforma europeica presentëia da püch sön süa plata internet l’intendënt Roland Verra sciöche espert dl mëis de forá y fej ince referimënt a süa publicaziun “The Ladin language in education in Italy".
-
Concurs publich por ladins: Cater posć por colaboradus aministratifs
L’Aministraziun provinziala á publiché incö, ai 11 de forá, n concurs por cater posć por colaboradus aministratifs resservá ai ladins. I posć é a tëmp indeterminé, dui a tëmp plëgn y dui a tëmp parzial. An pó se scrí ite cina ai 2 de merz dl 2016.
-
De internazional dl lingaz dla uma: Convëgn ai 19 de forá
En gaujun dl De internazional dl lingaz dla uma ogranisëia le Sorvisc de coordinamënt por l’integraziun en vëndres, ai 19 de forá dl 2016, dales 17.00 inant n convëgn en presënza dl soziologh Adel Jabbar y cun le scienziá Lorenzo Zanasi dl Eurac tl Palaz Widmann a Balsan. L’entrada é debann, iscriziuns tres email.
-
Trafich söi jus: Löm vërda dal govern por les normes d’atuaziun
Le Südtirol ará tl dagní la poscibilité da antergní diretamënter por limité le trafich di auti ince por sostigní la sconanza dl ambiënt y dl paesaje. La norma d’atuaziun che regolamentëia chësc argomënt é gnüda aprovada inier da sëra (ai 10 de forá) dal Consëi di Ministri en presënza dl presidënt Arno Kompatscher. Löm vërda ince ala norma sön la Curt di Cunc.
-
Le Liber dl sport südtirolej 2015 gnará presenté ai 15 de forá
Imajes, inoms y stories sará tl zënter dla secunda ediziun dl Liber dl sport südtirolej 2015, che contëgn les sfidades y les arjuntes sportives plü beles tl ann passé. Le liber dl sport gnará presenté dal’assessuria Martha Stocker, adöm ai ghesć d’onur y campiuns dl monn 2015 Roland Fischnaller, Evelin Lanthaler, Patrick Pigneter y Florian Clara.
-
Coliamënt feroviar Val de Puster – Ciadura: ai 13/02 la firma a Cortina
En sabeda, ai 13 de forá, sará le presidënt dla Provinzia Arno Kompatscher y le presidënt dla Regiun Venet Luca Zaia a Cortina por sotescrí le protocol d’acordanza por la planificaziun de n coliamënt feroviar danter la Val de Puster y le Ciadura. Ala firma sarál ince presënt le minister por les infrastrotöres y i trasporc Graziano Delrio.
-
De mondial di amará: assiguré l’assistënza sanitara tl dagní
„Assiguré l’assistënza sanitara te Südtirol ince por i agn che vëgn: chësc é nosc compit primar“, sotlignëia l’assessuria provinziala Martha Stocker en ocajiun dl De mondial di amará che toma ai 11 de forá. Tl zënter dles politiches sanitares mëssel ester i paziënc cun sü bojëgns, y ince cun sües tëmes, preocupaziuns y nezescités, insciö Stocker.
-
Consulta di jogn: Löm vërda al program anual - Chestiun dla ciasa tl zënter
La Consulta di Jogn ladina s’á incunté en vëndres (05/02) a La Ila por dé jö so arat sön le program anual por la promoziun dl sorvisc jogn dl grup linguistich ladin. Do na debatüda é le plann gnü aprové. La Consulta á ince stabilí, da orëi se dé jö tl dagní de plü cun la chestiun di jogn y dla pröma ciasa por informé i jogn sön les poscibilités de cumpra y costruziun de na pröma ciasa.
-
Mertesc ai 9 de forá degöna sentada dla Junta provinziala
Ai 09 de forá, mertesc de Carlascé, sará i ofizi daverc ma danmisdé y al ne sará degöna sentada dla Junta provinziala. Le presidënt, i assessurs y les assessuries s’incutará indô ai 16 de forá.
