Atualità
-
Trasport publich local: Orars nüs dai 13 de dezëmber
La secunda domënia de dezëmber se müda vigni ann te döta l’Europa i orars dles ferates. „Chësc termin é chësc ann ince na data dër important tl Südtirol, por atualisé sides i orars dles ferates che ince dles corieres y por i adaté ales nezescités“, á splighé l’assessur Florian Mussner. Por le pröm iade él gnü presenté chësc ann na suraodüda anuala di orars dl trasport publich, insciö Mussner.
-
Contribuc por valorisé i zëntri storics y i zëntri comerziai naturai
La Junta provinziala ó sostigní cun aiüc straordinars scomenciadies por valorisé i zëntri storics y i zëntri comerziai naturai. La Junta á aprové incö (ai 09/12) i criters d’azes a chisc intervënc straordinars por 100mila euro l’ann. I benefiziars é les assoziaziuns de categoria, i istituc, i ënc y les organisaziuns sön le teritore che se crüzia da realisé proiec de svilup.
-
Dala Junta: stipendiums por le secundo lingaz y i lingac foresti
Chi che frecuentëia danter otober 2015 y setëmber 2016 n curs de lingaz forest o n curs tl secundo lingaz (todësch o talian) pó damané do n stipendium. La Junta provinziala á aprové incö (ai 9 de dezëmber) les bandides de concurs. Les domandes por la conzesciun de n stipendium pó gní presentades cina de jená dl 2016.
-
Operes de proteziun cuntra l’ega: Rü de Fojedöra cun barieres de proteziun
Ti ultimi dis él gnü stlüt jö i laurs por fá sö les barieres de proteziun nöies dl Rü de Fojedöra sura Al Plan de Mareo. Al é jü debojëgn de cater loc por realisé le sistem de segurëza, che é metü adöm da cin barieres de proteziun. Indöt él gnü investí 940.000 euro.
-
Open data Südtirol: la porta digitala ales aministraziuns publiches
I dac dles aministraziuns publiches tl Südtirol é sëgn azessibli te na forma unitara y pó gní adora tres n sistem digital. Incö (ai 9 de dezëmber) á l’assessuria por l’informatica Waltraud Deeg presenté le portal nü Open data Südtirol, olache düc i ënc publics mët a desposiziun les informaziuns che pó gní adorades da istituziuns y zitadins.
-
En sorvisc de scora y patria: Presenté le liber de Eduard Pizzinini
Inier, domënia ai 06 de dezëmber, él gnü presenté a Al Plan l’autobiografia de Eduard Pizzinini, personalité conesciüda tl Comun de Mareo y surafora. Sües recordanzes pó sëgn gní lites do tl liber nü „na vita al sorvisc dla scora y dal paisc“ dé fora dal Ciamp Inovaziun y Consulënza dl Departimënt Educaziun y Cultura ladina.
-
Evënt leterar te trëi lingac por festejé le De dla munt ai 11/12 a Balsan
En vëndres, ai 11 de dezëmber organisëia la sënta destacada dl Secretariat dla Convenziun dles Alpes tl Museion a Balsan, pian ia dales 19, l’evënt leterar “Leggere le Montagne, Berge Lesen, Lì les muntes” en ocajiun dl De internazional dla munt, en colaboraziun cun les trëi Repartiziuns por la Cultura y cun la seziun de Balsan dl CAI y dl Alpenverein. Ala pert ince l’auturia Rut Bernardi.
-
Kompatscher sön la lege söi apalc nöia: favorí l’economia y l’ocupaziun
„Öna dles leges plü importantes dla legislatöra“: insciö definësc le presidënt dla Provinzia Arno Kompatscher la lege che regolamentëia i apalc publics aprová incö ( ai 4 de dezëmber) dal Consëi provinzial. „Cun la lege nöia él psocibl da mët les fondamëntes por garantí de miú condiziuns al’economia y por sostigní l’ocupaziun“, spliga Kompatscher.
-
Adatamënt dla reforma scolastica: Sëra d'informaziun a Urtijëi
La pröma incuntada d’informaziun sön l’adatamënt dla reforma scolastica statala “La Buona Scuola” ala normativa provinziala y les novités por le sistem scolastich ladin é gnüda tignida inier jöbia, ai 03 de dezëmber, a Urtijëi.
-
Junta provinziala: sentada ai 9 de dezëmber a Trënt zënza conferënza stampa
La proscima edema gnará la sentada dla Junta provinziala spostada da en mertesc 8, festa dl’Imacolada, a en mercui ai 9 de dezëmber. Deache al é ince preodü por en mercui na reuniun dl Consëi regional sará la sentada dla Junta a Trënt. Porchël ne sarál ince degöna conferënza stampa a Balsan.