Atualità

En sabeda ai 7 de novëmber gnarál tigní na sentada deboriada dles trëi Consultes di Jogn di grups de lingaz ladin, todësch y talian. Dales 17.30 sarál spo poscibl da incunté i rapresentanc dles consultes por informaziuns y domandes.

L’entrada te vera dla Talia y les situaziuns de vera sön le front é les tematiches dl convëgn dediché al “Ann de vera 1915” che pëia ia en jöbia ai 12 (cun na mësa torona) y che vá inant en vëndres ai 13/11 (cun referac). Le convëgn é organisé dala Teßmann y dal’Academia austriaca dles Sciënzes adöm cun le Zënter de competënza regionala dla LUB y l’Istitut storich talian-todësch de Trënt.

„I sun sigüsc che la promoziun di sorvisc d’assistënza spezialisá pois ti garantí ales families n sostëgn y n’informaziun plü ampla y n renforzamënt abonora“, á dit l’assessuria provinziala Waltraud Degg incö (ai 4 de novëmber) a Balsan ala presentaziun dles mosöres formatives preodüdes por les families dl Südtirol. Le Departimënt Familia mët a desposiziun vigni ann 3,6 miliuns de euro.

Da chësta edema él da ciafé sön la plata dl’Euregio Tirol-Südtirol-Trentin n concurs fotografich cun pesć dediché ala sajun da d’altonn tl Euregio. Cina ai 15 de novëmber él düc che pó mené sües fotografies dl altonn che gnará spo coiüdes adöm te n album spezifich sön Facebook. La dezijiun sön chi che davagna le concurs sará tles mans di vijitadus de FB.

La Junta provinziala á fat n vare inant incö por ci che reverda l’atuaziun tl Südtirol dl program plurianual nü (2014-2020) dl Fonds sozial europeich. Sön proposta dl presidënt Kompatscher él gnü nominé les porsones che manajará i rodi dl’autorité de gestiun, dla zertificaziun y dl audit. Le presidënt Kompatscher á implü anunzié da orëi „stlü jö cina d’isté la contabilité intardiada dl FSE.“

Le dovëi de bilinguism é sté un di temesc afrontá incö (3 de novëmber) dala Junta provinziala. Sön proposta dl presidënt dla Provinzia Arno Kompatscher, á l’esecutif aprové na deliberaziun che propon la mudaziun de na norma d’atuaziun dl Statut d’autonomia por garantí l’adoranza dl todësch ti ac notarii.

La Junta provinziala á aprové incö (ai 3 de novëmber) sön proposta dl’assessuria Martha Stocker i criters por la conzesciun di stipendiums por la formaziun tl setur sanitar por ci che reverda l’ann academich 2015/16.

Dal mëis de aurí dl 2014 él gnü aprové l’esenziun zënza scadënzes dal paiamënt dl ticket por paziënc che á maraties croniches de zircolaziun. Cun la deliberaziun aprovada incö (ai 3 de novëmber) dala Junta provinziala vëgn le passaje dal sistem vedl (36 mëisc) al sistem nü (zënza limic de tëmp) fat te na manira automatica. „L’obietif – sotlignëia Stocker – é chël da smendrí la burocrazia."

La Junta provinziala á aprové incö (ai 3 de novëmber) la secunda pert dl finanziamënt 2015 por l’Université Lëdia da Balsan. La Provinzia mët a desposiziun 15,2 miliuns de euro por l’ativité dl ënt de formaziun y ti conzed, danterater, da manajé inant la Biblioteca medejinala virtuala.

Ince tl ciamp dla medejina nia convenzionada é la formaziun cualificada n criter fondamental por podëi garantí la cualité dles prestaziuns pitades. La Junta provinziala á porchël aprové incö (ai 03/11) les modalités de reconoscimënt dla zertificaziun a istituziuns publiches y privates por pité prestaziuns ti seturs dl’agopuntura, dla fisioterapia y dl’omeopatia.