Atualità

Na delegaziun cineja, cun a ce l’aconsiadú tecnich-scientifch dl’ambasciada tla Talia, Cao Jianye, á vijité incö (ai 28 d’otober) a Palaz Widmann le presidënt dla Provinzia, Arno Kompatscher. Tl zënter dl’incuntada él sté l’autonomia dl Südtirol y poscibilités de colaboraziun ti seturs dl’economia y dl turism.

Mosöres, proiec y obietifs por sostigní le svilup de n’aministraziun tres plü moderna y orientada al dagní: chësc é le contignü dl plann strategich Südtirol digital 2020 aprové inier dla Junta provinziala y presenté incö (ai 28 d’otober) dal’assessuria Waltraud Deeg.

Löm vërda da pert dla Junta provinziala al proiet „Südtirol digital 2020“, le documënt strategich che contëgn les mosöres y i obietifs por modernisé l’aministraziun provinziala. I detais dl documënt strategich gnará presentá indoman (mercui ai 28 d’otober) dal’assessuria Waltraud Deeg te na conferënza stampa dales 10.00 a Balsan.

Löm vërda dala Junta provinziala al dessëgn de lege che reverda le bilanz de previjiun 2016, le pröm elaboré aladô dla stroröra de contabilité nöia. L’eserzize messass se stlüje cun 5,4 miliarg de euro y tl zënter sarál chësc ann indô les alisiraziuns fiscales, cun l’aumënt dla No-Tax-Area sön l’ajunta IRPEF.

Les tratatives por la sortida de SEL Spa dala sozieté energetica taliana Edipower é gnüdes deliberades. Incö (ai 27 d’otober) s’á la Junta provinziala dé jö cun i proscims vari da fá y á confermé le sostëgn ala SEL por la conclujiun dles tratatives cun Edison por ci che reverda la surantuta di implanc idroeletrics tl Südtirol.

La Junta provinziala á tut la dezijiun incö (27/10) da fá para pro les ativités dl zënter LEED de Trënt dl’OCSE (Organisaziun por la cooperaziun y le svilup economich), che sostëgn les istituziuns tles ativités de svilup local y d’ocupaziun. La Provinzia fajará na convenziun cun l’OCSE por realisé na colaboraziun cun le Zënter LEED de Trënt.

11 Regiuns talianes laora para tl ciamp dla medejina de trasfujiun de sanch. Tl chëder de chësta cooperaziun á la Junta provinziala aprové incö (ai 27 d’otober) na bandida de gara interregionala por la lauraziun dl sanch y di componënc dl sanch. Implü él gnü renové la convenziun cun l’AVIS cina le 2018.

Na sentënza fata da püch dal TAR de Balsan â detlaré che le bonus cubatöra é ma legitim por le ressanamënt energetich de frabicac esistënc y nia por costruziuns nöies, sciöche indere preodü dala Junta provinziala. Por stlarí la chestiun á la Junta provinziala aprové incö (27/10) na proposta de mudaziun dl articul 127 dla lege urbanistica provinziala, che vëgn sëgn menada inant al Consëi provinzial

Na sëra cun n tema particolar por daidé porsones che á pordü na porsona amada y che mëss se confronté cun la plüra – chësta é la tematica dla Nöt dla plüra y dla consolaziun metüda a jí dal Raiun Sozial Val Badia y dala Caritas en sabeda ai 31 d’otober dales 19.00 inant tl Museum Ladin Ciastel de Tor a San Martin. La partezipaziun é debann.

IDM Südtirol-Alto Adige é l’inom dl’aziënda speziala dla Provinzia y dla Ciamena dl comerz, presentada incö (23 d’otober) a Balsan, che unësc te n’aziënda unica dal 1 de jená dl 2016 inant les sozietés BLS, EOS, SMG y TIS. Le inom é n ressüme di trëi conzec che sará la basa strategica dl orientamënt dl’aziënda de sorvisc nöia por l’economia südtiroleja: Innovation, Development y Marketing.