Atualità

Dal 2016 inant sarál ativa tl Südtirol n’aziënda speziala nöia nasciüda dala fujiun danter les cater organisaziuns locales che pita sorvisc tl ciamp dl comerz: BLS, EOS, SMG y TIS. L’aziënda nöia gnará presentada en vëndres ai 23 d’otober a Balsan en presënza dl presidënt dla Provinzia Arno Kompatscher.

Ara é preodüda por incö (13 d’otober) la votaziun finala tl Senat dl percurs de reforma dla Costituziun, denant co passé ala ’Camera’. Sön la chestiun él intergnü le presidënt dla Provinzia Arno Kompatscher do la sentada dla Junta provinziala: i senaturs südtirolej litará por la reforma dl titul V, deache la particolarité dl Südtirol sciöche provinzia autonoma vëgn sconada, insciö Kompatscher.

Aladô dl presidënt dla Provinzia, Arno Kompatscher é les critiches portades dant ti dis passá ti confrunc dl prozes de reorganisaziun dl setur dl turism „früt de na malintenüda“. Kompatscher á sotligné che „al gnará a se le dé n’integraziun de düc i auturs“ y á desdit che le 50 porcënt dla cuta de sojornanza ti pois gní tuta ales singules assoziaziuns turistiches.

Te doi enes scumencerà l Ufize Sistemazion de ruves da mont y peralevines nord cun lëures tl Derjon te na trata de n 300 m danter la cunfluenza cun l Isarch y l viadot dl’autostreda dl Prëner a Pruca.

Ince tl dagní ará i paziënc dl Südtirol che mëss fá cures de reabilitaziun do amputaziuns, ictus y de plü traumesc la poscibilité da fá la reabilitaziun tl zënter tirolej de Bad Häring. La Junta provinziala á tut la dezijiun da arlungé cina la fin dl 2018 la convenziun cun le zënter spezialisé tl’Austria.

Le presidënt Arno Kompatscher tól posiziun en referimënt ales critiches da pert de n grup d’assoziaziuns cuntra le proiet che reverda l’aeroport de Balsan. „Al se trata de n na ideologich – á splighé le presidënt dla Provinzia tratan la conferënza stampa do la sentada dla Junta provinziala – ma do la presentaziun dl plann strategich podarál gní daurí na debatüda ogetiva.“

La Junta provinziala á aprové incö (ai 13/10) le dessëgn de lege che contëgn les „Desposiziuns nöies sön i apalc publics“. La Provinzia de Balsan sará insciö la pröma regiun taliana che rezepësc les diretives nöies dla Uniun Europeica sön la tematica di apalc. Le ddl nü porta para na seria de scemplificaziuns burocratiches cun de plü impulsc por les impreses locales.

Cun indöt 85 miliuns de euro ó la Provinzia de Balsan investí tl svilup dl teritore. Al se trata de ressurses finanziares metüdes a desposiziun dal Fonds strategich regional por investimënc a bëgn dl svilup dl teritore. La Junta á aprové incö (ai 13 d’otober) le program cun i seturs d’investimënt prinzipai.

Da en mercui ai 21 d’otober podará düc i notars dl Südtirol y de düc i Comuns catastals dla Provinzia mené inant tres na prozedöra telematica düc i documënc y ac che reverda les domandes d’inserimënt tl Liber fondiar. La perioda de proa scomenciada de má dl 2015 á dé na seria de resultac positifs y la Junta á insciö tut la dezijiun incö (ai 13/10) da amplié le sorvisc.

Laurada sö dal punt d’odüda scientifich, cun na cornisc musicala nöia y arjignada por la paladina: insciö se mostra sëgn l’opereta „Le scioz da San Jênn”. Dan da püch á i auturs Fonso Willeit, Paul Videsott y André Comploi presenté a La Pli de Mareo la publicaziun nöia de „Le scioz da San Jênn” che é gnüda laurada fora en colaboraziun cun le Museum ladin Ciastel de Tor.