Atualità

Co pó pa i geniturs sostigní le svilup dl lingaz di mituns? A chësta domanda ti jará dui esperc dl setur a funz tratan n referat organisé dla Biblioteca provinziala Teßmann, adöm cun l’Ofize linguistich dl Istitut cultural dl Südtirol, ai 30 de setëmber a Balsan. La sëra d’informaziun é n’ocajiun ince por geniturs por s’informé sön la tematica dl’educaziun linguistica dles mitans y di mituns.

Indöt 50 ciantarines jones y ciantaris jogn ará la poscibilité da tó pert a na edema de formaziun musicala tl contest dl „Stimmcamp 2015“ che gnará metü a jí dai 5 ai 11 de novëmber a Toblach. Organisada vëgn l’edema dales scores de musiga ladines y todësces, les iscriziuns pó gní fates cina ai 28 de setëmber.

Dales 18:00 de incö (mertesc 22 de setëmber) da sëra é la strada statala dl Prener indô daverta al trafich tla trata da Balsan tla direziun de Tlüses, stlüta da en vendrës ai 18 de setëmber por gaujia dl pericul dla tomada de peres. Les operaziuns de control dla trata é gnüdes stlütes jö incö domisde.

Le trafich sön i jus dles Dolomites é sté tl zënter de n’incuntada danter i assessurs Richard Theiner y Florian Mussner cun i ombolc dles valades ladines inier (21/09) a Balsan.

La strada statala dl Prener a nord de Balsan gnará plüssigü daurida incö da sëra (22/09), n de dan le termin preodü. La sarada dla strada jô debojëgn por efetué n valgügn intervënc de prescia y de metüda en segurëza dla strada.

20 euro impede co 150 euro: chësc sará le contribut da paié por i lerneri sot ai 18 agn por podëi s’anuzé dl Abo+ le proscim ann scoalstich 2016/17 y che pormët da anuzé por n ann le sorvisc dl trasport publich local. La dezijiun é gnüda tuta incö (22 de setëmber) dala Junta provinziala.

Cursc spezialisá por dötes les porsones che se möi sön strada y na sensibilisaziun costanta tl vers de na mobilité plü sostenibla - La Junta provinziala á aprové incö (ai 22 de setëmber) n’acordanza nöia cun le Safety Park che á valüta cina le 2019. „Aladô de chësta acordanza gnarál ma plü sostigní ativités de promoziun dla segurëza stradala“, insciö l’assessur Florian Mussner.

Dal 2013 é i contribuc provinziai por l’afit strotorá atramënter: les döes prestaziuns da denant, le sostëgn por la ciasa paié dal IPES y le contribut por l’afit paié dai raiuns soziai, vëgn metüs adöm te na sora prestaziun. Tla fasa transitora dl regolamënt nü vál debojëgn de n valgügn adatamënc aprová incö (22/09) dala Junta provinziala.

Al é de indöt 32 miliuns de euro le import preodü por la perioda 2014-2020 dal program dl Fonds europeich por le svilup regional (FESR) ti seturs dl’archirida y dl’inovaziun. Do la löm vërda al program operatif „Investimënc de sostëgn ala cresciüda y al’inovaziun“ á la Junta provinziala aprové incö (22/09) sön proposta dl presidënt Arno Kompatscher la pröma bandida por 10 miliuns de euro.

Dal mëis de novëmber 2015 cina jená 2016 gnarál organisé n percurs de stüde che portará indô de plü cenc de scolars dal Südtirol, dal Trentin y chësc ann ince dal Tirol, sön le iade dla recordanza a Auschwitz-Birkenau y a Cracovia. L’ediziun nöia é gnüda presentada incö (21/09) dai trëi assessurs por la cultura Mussner, Tommasini y Achammer y dales organisaziuns partezipantes.