Atualità

La Junta provinziala á aprové incö al 1 setëmber la realisaziun de na staziun de control fissa por i camions da marcianzies sön l’autostrada dl Prener dlungia la sortida che porta a Sterzing.

Ti ultims agn é ince tl Südtirol aumenté l’importanza dla medejina paliativa, che reverda la cura, l’acompagnamënt y l’assistënza de paziënc gravemënter amará che ne respogn nia plü a tratamënc spezifics y che é te na fasa terminala. Incö á la Junta provinziala aprové na zertificaziun dl’esperiënza trienala dles cures paliatives por i doturs zënza na formaziun spezifica te chësc ciamp.

Cun incö al 1 de setëmber é Edith Ploner la presidënta nöia dl Consëi scolastich provinzial y che ará insciö la funziun de coordinaziun dles sentades plenares dl organ de consultaziun dla Junta provinziala sön tematiches che reverda le monn dla scora. Dl Consëi scolastich fejel pert rapresentanc di trëi grups linguistics dl Südtirol.

La tematica di migranc sciöche sfidada atuala mo ince sciöche n avenimënt dl tëmp passé, che á atoché diretamënter ince la realté dles valades ladines dan da n secul, sará tl zënter de na conferënza por talian cun l’espert Leonhard Voltmer tla sënta dl Museum Ladin a San Martin de Tor en vëndres, ai 4 de setëmber dales 20.30. L’entrada é debann.

En ocajiun dl De dl’Autonomia en sabeda ai 5 de setëmber deura le Consëi provinzial y l’Aministraziun provinziala por le secundo iade sües portes. La tematica prinzipla dl de sará la familia. Dlungia les ativités desvalies che an pó vijité ti palac provinziai vëgnel ince metü da jí n convëgn sön „l’autonomia y la resistënza“ y na premiaziun di maturanc plü lezitënc dl Südtirol.

Cun le scomenciamënt dl ann scolastich nü pëia ince indô ia la campagna de sensibilisaziun "S.O.S. Zebra!" che á l’obietif da eduché i mituns por mantigní n comportamënt plü sigü sön strada. L’ediziun nöia gnará presentada ai 7 de setëmber dal assessur provinzial Florian Mussner al Safety Park de Pfatten.

En vëndres ai 4 de setëmber organisëia le Museum Ladin Ciastel de Tor na vijita acompagnada debann dla mostra tematica „1914-1918. Al de là vigni confin. I Ladins conta sua storia“. Al gnará ince a se le dé na vijita acompagnada – tres debann – dles staziuns dl proiet artistich SMACH y ala mostra d’ert tl Istitut Ladin Micurá de Rü. Les vijites sará por talian.

Sura 40 agn á Romi Crazzolara lauré te plü inciaries pro les scores dles valades ladines. Naota sciöche maestra, spo sciöche direturia dles scores elemetares dla Val Badia y dla direziun de Mareo y dal 2009 sciöche ispeturia dles scores ladines. „Cun süa profescionalité, dediziun, competënza y respet ára dé n gran contribut por nosta scora ladina y por la formaziun de vita“, insciö l’ass. Mussner.

En ocajiun dl Dé dl’Autonomia vëgnel premié dal presidënt dla Provinzia Arno Kompatscher y dai assessurs por la scora Florian Mussner, Christian Tommasini y Philipp Achammer dötes les maturantes y por düc i maturanc che á fat l’ejam de maduranza tl 2015 y arjunt le majer numer de punc. La premiaziun vëgn a se le dé sön la plaza Silvius Magnago en sabeda ai 05/09 dales 17.00.

Cun l’aprovaziun dla reforma dla scora statala ti á le Parlamënt surandé la competënza ala Provinzia de Balsan da reconësce les abilitaziuns da insigné por todësch stlütes jö te d’atri Stac dl’Uniun europeica. Chësta prozedöra valará ma por i maestri che á l’intenziun da adoré l’abilitaziun a livel provinzial.