Atualità

Le proiet de reorganisaziun dl Zënter de sperimentaziun agrara y forestala Laimburg y dl’Aziënda provinziala por l’aministraziun di bosć y dl demane é gnü presenté incö, ai 12 d’agost a Vadena dal assessur Arnold Schuler adöm cun i responsabli di dui ënc. L’obietif é chël da renforzé le Zënter Laimburg sciöche zënter de archirida, aumenté l’efiziënza dles aministraziuns y la segurté di cosć.

La Provinzia ti respogn ales critiches fates ti ultimi dis che reverda les prozedöres por damané do l’Abo + por scolars. „L’internet y le barat di dac online é oramai na realté“, sotlignëia l’assessur por la mobilité Florian Mussner, che spliga che „bele le mez di anuzadus á scrit fora les domandes online.“

„Euregio Tirol-Südtirol-Trentin, na ciasa coletiva nöia: integraziun impede estlujiun“. Chësc é le slogan dl De dl Tirol che gnará organisé a Alpach (Tirol) ai 23 d’agost tl contest dl Forum europeich.

Fá adinfora dl Safety Park n zënter de competënza nazionala sön le rovëne sigü: chësc é l’obietif dl’acordanza cheder danter la Provinzia de Balsan y l’„Automobile Club d’Italia“ (ACI) portada dant dal assessur por la mobilité Florian Mussner. La colaboraziun cun l’ACI prevëiga la realisaziun de cursc por recuperé i punc dla patent.

„Definí na regolamentaziun tlera, scëmpla y autonoma por ci che reverda la tematica di apalc cun l’obietif da ti dé impulsc nüs ales impreses y cooperatives locales.“ Chësc le messaje zentral dl presidënt dla Provinzia Arno Kompatscher do che la lege provinziala sön i apalc é gnüda debatüda incö (11 d’agost) te Junta.

La Provinzia de Balsan á aprové incö (ai 11/08) n investimënt de 3,7 miliuns de euro por renové i mesi a desposiziun dl Sorvisc strades dla Provinzia. La deliberaziun é gnüda proponüda dal assessur por la mobilité Florian Mussner che stlarësc ince i vantaji de chësta operaziun: mesi plü efiziënc, smendrimënt di cosć de manutenziun y dl incuinamënt.

Renforzé le rode dl Museum Natöra sciöche zënter de inrescida y formaziun y mëte a desposiziun d’atres lercs sot tera ite por pité locai d’esposiziun nüs: chësc é le fin dla deliberaziun aprovada incö (11 d’agost) dala junta provinziala sön proposta dl assessur Florian Mussner.

Por smendrí le numer d’inzidënc sön les strades di jus da munt él la Junta provinziala che á aprové incö, mertesc ai 11 d’agost, l’introduziun de sistems de monitoraje dla velozité mesana cun sanziuns por chi che vá cun na velozité plü alta co chëra conzedüda.

La Junta provinziala á aprové le bilanz supletif de 110 miliuns de euro che taca adöm cun la lege finanziara. Al é preodü n adatamënt de n valgügn articui che reverda la lege sön le personal, cina la fin dl mëis de setëmber él preodü la discusciun tl Consëi provinzial.

Tl Consëi di Comuns á l’assessuria por les families Waltraud Deeg presenté l’edema da denant les diretives por l’orientamënt nü dl’assistënza di mituns te Südtirol. L’assessuria, che é gnüda acompagnada da öna dles ideadësses dl conzet Gertraud Battisti, á sotligné che „i Comuns é n partner important, n barat de idees é porchël fondamental“.