Atualità

La Junta provinziala á fat fora incö (28/07) da ajunté 13 miliuns de euro al fonds por les domandes d’antizipaziun dl bonus fiscal por intervënc de ressanamënt dla pröma ciasa. La soma d’imprëst gnará calcolada sön la basa dles detraziuns dles cutes. La gestiun finanziara de chësc intervënt ti é gnüda surandada ala sozieté inhouse dla Provinzia, la „Alto Adige Finance Spa“.

„Les munts unësc y ne despartësc nia“: chësc é sté le moto dla sotescriziun dl protocol d’acordanza danter i presidënc dla Lombardia y dl Südtirol, Roberto Maroni y Arno Kompatscher, por valorisé le raiun dl Stelvio cun n’atenziun particolara ai raiuns dl ju y dl Parch nazional. Te chësc contest él ince preodü da fá n stüde de fatibilité por realisé n tunel da anuzé döt l’ann.

Le consëi d’aministraziun nü dl Istitut Ladin Micurá de Rü é gnü aprové da püch dala Junta provinziala y á albü en jöbia, ai 23 de messé, süa pröma sentada costituënta. Albert Videsott y Bruno Senoner é gnüs reconfermá te sües inciaries sciöche presidënt y vizepresidënt.

En ocajiun dla zelebraziun anuala dl De de San Cristofe, protetur di viagiadus y di autisć, inviëia l’assessur por la mobilité Florian Mussner a plü prudënza sön strada y a n comportamënt responsabl y cosciënt canche an é sön le iade.

En vëndres, ai 31 de messé dl 2015, dales 17.00, tl Zënter dles scores altes, strada Josef Ferrari 16 a Bornech, gnarál surandé ofizialmënter la palestra scolastica d’arpizada y bouldering K3 dai assessurs provinziai Christian Tommasini y Philipp Achammer.

„Lo Stelvio al centro delle Alpi“, chësc é le titul dl convëgn metü da jí dala Regiun Lombardia preodü por en lönesc, ai 27 de messé sön le ju danter la Val Venosta y la Valtellina. Danter i reladus che tolará pert al convëgn sarál le presidënt dla Provinzia Kompatscher, y i surastanc dl govern dla Lombardia Roberto Maroni y dl Trentin Ugo Rossi.

Le contribut regional por les families podará gní gestí tl dagní autonomamënter dala Provinzia. La Junta regionala á dé incö te süa sentada ai 23/07 l’aprovaziun por le passaje dles competënzes.„Chësc passaje nes pormët da armonisé deplü les mosöres tl setur dles politiches familiares, da adoré i mesi te na manira plü spezifica y da scemplifiché le paiamënt di contribuc“, insciö l’assessuria Deeg.

I laurs de dortorada dla strada provinziala che porta dal zënter dl paisc de San Martin de Tor al Museum Ladin Ciastel de Tor é gnüs stlüc jö da püch. L’intervënt jô debojëgn por aumenté la segurëza stradala de autisć y peduns. Le cost dl intervënt é de 462mile euro.

Ci faziun á pa albü la Pröma vera mondiala sön i ladins incër le grup dl Sela? Ci orôl pa dí da vire te n raiun dl frunt? Co á pa i ladins lauré sö chësc capitul dla storia? Cun chëstes domandes se dá jö la mostra dal titul "1914-1918 - Al de là da vigni confin. I Ladins i conta sua storia" tl Museum Ladin a San Martin de Tor. L’assessur Florian Mussner á daurí la mostra ai 17 de messé.

L Cunsëi d’istitut dl Istitut Ladin "Micurà de Rü" - metù adum da sies persones - ie unit istituì da nuef ncuei, ai 14 de lugio, dala Jonta provinziela sun pruposta dl Assessëur ladin Florian Mussner. La prupostes ie unides fates dala lies cultureles de Gherdëina y dla Val Badia.