Atualità

La junta provinziala á metü incö (16 de jügn) les fondamëntes por lauré fora n plan provinzial por la prevenziun. “Sconé la sanité di zitadins tres na ativité de prevenziun che cür döt – á sotrissé l’assessuria Martha Stocker – rapresentëia un di pilastri dla reforma sanitara y á porchël la priorité”.

Ai 28 de ma dl 2015 é i laurs de recostruziun dl punt danter Lijun y Rungg tl Comun de Lijun al chilometer 13,60 dla strada provinziala 30 jüs a piz. Indöt á i laurs albü na dorada de n ann y á costé 917.757 euro.

Assistënc y assistëntes di mituns y mitans cun n titul de stüde südtirolej é dër damaná ince foradecá. Bele por le cuarto iade dal 2014 inant vëgnel organisé dal Zënter de mediaziun laur da Balsan n domisde d’informaziun por personal interessé a n post de laur tl Paiern o tla Germania. Le termin é ai 19 de jügn.

Cun incö (12/06) se röia por la maiú pert di scolars dles scores altes y profescionales l’ann de scora, por i mituns dles scolines y por i scolars dles scores elementares y mesanes sará l’ultim de de scora ai 16/06. Por la fin dl ann de scora ti fej i assessurs Mussner, Achammer y Tommasini a düc i scolars y dötes les scolares les mius aodanzes por de beles vacanzes y döt le bun por i ejams finai.

Le diretur general nü dl’Aziënda sanitara dl Südtirol Thomas Schäl metará man süa inciaria en lönesc, ai 15 de jügn. Incö, vëndres ai 12 de jügn s’ál presenté te na conferënza stampa ai media. „L’obietif é chël da condüj inant n sistem dla sanité che funzionëia bun y dal svilupé do les linies stabilides dala politica“, á sotligné Schäl.

Le consul general dl’Austria a Milan, Wolfgang Spadinger á incunté incö, jöbia ai 11 de jügn l’assessur ladin Florian Mussner: tratan l’incuntada él gnü traté la situaziun di Ladins dl Südtirol y en general dles Dolomites.

Tratan les vacanzes scolastiches da d’isté podará i jogn y les jones che á n Südtirol Pass abo+ vijité debann plü co 60 museums dla provinzia. La scomenciadia fej pert dl ann tematich „Young & Museum“ y é n proiet de colaboraziun danter la Repartiziun Museums y la Repartiziun Mobilité dla Provinzia.

Dal mëis de ma dl 2014 él atif le numer vërt 800 001 800 tres chël che porsones atempades che é vitimes de violënza (mo ince por testimoni de violënza) pó damané aiüt. Dan l’aniversar dl Dé mondial cuntra la violënza sön porsones atempades á l’assessuria Martha Stocker fat n ressüme dl pröm ann do l’ativaziun dl numer.

Les strategies por l’ampliamënt dla banda leria y dl coliamënt internet asvelt é stades les tematiches prinzipales dl’incuntada da incö (11 de jügn) a Roma danter l’assessuria Waltraud Deeg y la Ministra por le svilup economich Federica Guidi. „La banda lëria é n’infrastrotöra fondamentala por la chersciüda dl teritore“, á sotligné Deeg.

En mercui, ai 17 de jügn gnarál surandé dales 14.00 domisdé (y nia sciöche anunzié denant dales 09.00) indöt 30 posć tles scolines ladines por le proscim ann de scolina. Les maestres che é tles gradatöres por trasferimënc y por inciaries a tëmp determiné é inviades da se presenté tla direziun dles scolines da Piculin.