Atualità

La Junta provinziala á nominé incö (mertesc ai 9 de jügn) do na prozedöra de seleziun gnüda manajada da na comisciun d’esperc y sön proposta dl’assessuria por la sanité Martha Stocker le diretur general nü dl’Aziënda sanitara dl Südtirol. Al se trata de Thomas Schäl che tignará na conferënza stampa de presentaziun ai 12 de jügn.

Löm vërda dala Junta provinziala incö (mertesc ai 9 de jügn) ai critérs nüs por la conzesciun de alisiraziuns a bëgn dles imprejes de erës. Les domandes d’azes ales formes de sostëgn podará gní presentades dal 1 de lugio inant. „Cun chësta dezijiun ún indô daurí döt le sistem de sostëgn dl’economia“, á sotligné le presidënt Kompatscher.

Le presidënt Kompatscher tól at cun sodesfaziun dl svilup positif dl’ocupaziun y che é gnü confermé dai dac dl raport sön le marcé dl laur presenté inier. „Les statistiches nes confermëia che le svilup dl marcé dl laur südtirolej é positif y chësc é ince mirit dles mosöres atuades dal govern provinzial cun la creaziun de posć de laur nüs y la diminuziun dla presciun fiscala por le imprejes.“

482 porsones che á fat domanda do asil sojornëia atualmënter tles sis strotöres por i migranc tl Südtirol. Sön invit dl’assessuria por le sozial Martha Stocker á vijité sis aconsiadus dl Consëi provinzial incö, lönesc ai 8 de jügn, n valgönes dles strotöres d’acoliënza a Balsan y Maran por se fá n’idea generala dla situaziun atuala di migranc tl Südtirol.

Al é gnü presenté incö dal’assessuria Martha Stocker le raport sön le marcé dl laur tla Provinzia de Balsan che reverda la perioda dal novëmber 2014 al aurí 2015. Al é gnü registré n aumënt dl 0,8 porcënt dl’ocupaziun y na porcentuala de dejocupaziun de 4,6 porcënt, cun pröms segnai de chersciüda ti seturs dl turism y dl’agricoltöra cun le setur dl’edilizia che é ciamó en dificolté.

La funtana minerela de solper di Banies de Razes, che univa bele nuzeda tl dejedotejim secul per la cura de desturbs defrënc, ie inò davierta. Dan n valgun dis ie la oasa dl chiet nueva defati unida giaurida: l se trata dl diejim proiet (sun undesc) de chësta sort cumpletà tla Provinzia de Bulsan.

Les gradatöres provinziales y d’Istitut provisories dles scores elementares, mesanes y altes dles localités ladines por l’ann de scora 2015/16 é gnüdes publicades ai 3 de jügn sön la plata ofiziala dl’Intendënza ladina. Les döes listes ne é nia ciamó definitives.

Le coliamënt dl svilup dla scora ladina cun les recordanzes personales dl maester, diretur y intendënt da denant Franz Vittur é tl zënter dla publicaziun nöia „recordanzes de n maester“ che é gnüda presentada incö (04 de jügn) a Badia. Le liber é gnü dé fora dal Ciamp Inovaziun y Consulënza dl Departimënt Educaziun y Cultura Ladina.

Costruí na rëi de colaboraziun danter i rapresentanc ladins tl’Euregio por sostigní le laur cultural y l’identité ladina: chësta é stada la tematica zentrala dl’incuntada a Balsan danter l’assessur por la cultura ladina Florian Mussner y Luca Agostini (presidënt dl Istitut cultural ladin Cesa de Jan), che é gnü nominé da püch rapresentant cultural di Comuns da Souramont tl’Euregio.

De plü cantiers ti Comuns de Corvara, Badia y Mareo é gnüs vijitá inier, jöbia ai 4 de jügn, dal diretur de departimënt Klaus Unterweger y dal diretur de repartiziun Rudolf Pollinger. A Corvara y Badia vëgnel porté inant i laurs de proteziun dales roes, tl Comun de Mareo vëgnel lauré por smendrí i prighi dl’ega alta.