Atualità

La Junta provinziala á aprové incö (19/05) danter l’ater la partezipaziun a n program europeich de promoziun por la cumpra de corieres a idrogren. Implü á la Junta dé löm vërda a n documënt de mascima por le passaje dl trasport de marcianzies sön les scines y por le smendrimënt dl trasport sön strada. Arat positif ince por le program dles ativités dl 2015 dl’aziënda Südtirol Marketing (SMG).

Por düc i scolars y les scolares dles scores altes y profescionales sará le vëndres, ai 12 de jügn, le ultim dé de scora. Sciöche i trëi intendënc Roland Verra, Peter Höllrigl y Nicoletta Minnei lascia alsavëi é chësc terminn gnü a se le dé por gauja dla pröma proa scrita dl’ejam de madoranza (matura) dles scores altes che gnará tigní en mercui ai 17 de jügn.

La fondaziun Dolomites UNESCO á premié incö (18 de má) a Balsan i davagnadus dles döes bandides sön la geologia: le concurs scientifich „Pest por le laur de dotorat Lorenz Keim“ y le concurs de idees „La geologia dles Dolomites – Stüde y proietaziun de n model geologich sön le teritore dles Dolomites“ ch reverda proiec de presentaziun y comunicaziun dles particolarités geologiches dles Dolomites.

L’assessuria por les politiches soziales Martha Stocker á stlarí incö , ai 18 de má, adöm ai rapresentanc dles assoziaziuns y di ënc de competënza, la situaziun sön l’acoliënza di migranc tl Südtirol. Tratan la conferënza él gnü porté dant i contignüs dl protocol de colaboraziun metü adöm por coordiné damí les ativités d’assistënza di migranc tl Südtirol.

25 proiec ti raiuns dai schi é gnü valutá da sis partner dl Arge Alp cun n concurs che reverda la sostenibilité, la sconanza dl ambiënt y la mobilité sostenibla. „Danter i proiec che á davagné él ince da ciafé la furnadoia sön Munt de Suc, le coliamënt feroviar Plan de Corones-Perca y le coliamënt Moena/Soraga – Jouf de Ciareja“, insciö l’assessur Mussner incö ala presentaziun.

N ucajion di 60 ani dl Istitut Tecnich Economich Raetia uniral festejà ai 22 de mei tla Cësa de Cultura Luis Trenker a Urtijëi. La scola mët a jì n program desvalif. Nce l assessëur Florian Mussner, che fova n iede sculé dl Istitut Tecnich Raetia, tulerà pert ala festa.

Tratan la festa por i 60 agn dala firma dl Tratat de Stat austriach, á le presidënt dla Provinzia Arno Kompatscher incunté incö (15 de má) a Viena le minister di afars cun l’ester Sebastian Kurz. Le presidënt á ajorné le minister sön les tratatives cun le govern talian che reverda le svilup dl’autonomia do la vijita de Renzi a Balsan.

En sabeda ai 23 de má vëgnel metü da jí a Desproch, en presënza di trëi presidënc dl’Euregio Günther Platter (Tirol), Arno Kompatscher (Südtirol) y Ugo Rossi (Trentin), la comemoraziun publica dla Gran Vera avisa cënt agn do l’ingres dla Talia tl conflit. La comemoraziun religiosa gnará tignida dai trëi vëschi dles diozejes, daldô él preodü n’incuntada di trëi presidënc.

L’assistënza y les modalités de sojornamënt dles porsones che damana do asil, sciöche ince la situaziun di migranc tratan le passaje tles staziuns dles ferates de Balsan y dl Prener é stades tematiches debatüdes tles ultimes edemes. Te na conferënza stampa ai 18 de má spligará l’assessuria Stocker, adöm ai rapresentanc dles assoziaziuns che se crüzia di migranc, la situaziun atuala te Südtirol.

Dal teritore al paesaje, dal cataster ales strades, dales misciuns ales localités. Bëgn 180 é les series de dac desponibles sön la plata internet nöia geoportale.retecivica.bz.it che é online da incö (14 de má). „Al se trata de n vare inant dër important – á splighé l’assessuria Waltraud Deeg – tla direziun de n’aministraziun tres plü digitala.“