Atualità

„La formaziun duala dla Provinzia de Balsan, che prevëiga l’alternanza danter scora y laur, é n model che i orun ince adoté tl rest dla Talia“. Cun chëstes parores á le premier Matteo Renzi stlüt jö incö (ai 5 de má) süa vijita al’intern dl’aziënda Stahlbau Pichler de Balsan, tratan chëra che al é gnü acompagné dal presidënt Arno Kompatscher y dala Junta provinziala.

Renforzé y svilupé inant deboriada l’autonomia: chësc é le resultat da incö (05/05) dl’incuntada danter le premier Matteo Renzi y i dui presidënc dl Südtirol y dl Trentin, Kompatscher y Rossi, che á concordé le program che prevëiga l’aprovaziun tl 2015 de normes d’atuaziun nia ciamo aprovades, la formaziun de plü grups de laur sön competënzes nöies y la metoda de laur por ajorné le Statut.

Di 342 insegnanc dles scores ladines dla Provinzia da Balsan, ne à incö, mertesc ai 05 de má, 8 nia laurè fajon para al scioper nazional dles scores. La porcentuala che à fat para a chësta protesta é insciö de 2,3 porcënt tles scores ladines. 42,29 porcënt di insegnanc á scioperé tles scores talianes, 18 porcënt te chëres todësces.

Dales ferates locales ales ferates a d’alta velozité, dal tunel de basa ales staziuns plü piceres: la Provinzia laora tresfora por renforzé les ferates regionales che vëgn conscidrades sciöche le motor prinzipal dl’economia y dl turism. Chësc é sté un di conzec prinzipai al convëgn da incö (04 de má) en gaujiun di 10 agn dla linia dla Val Venosta.

La rëi dles scines y dles staziuns dles ferates dl Südtirol vëgn ampliada y modernisada, dantadöt les linies che porta a Maran y tla Val de Puster, mo ince la linia dl Prener. La basa é gnüda stabilida incö (04/05) cun la sotescriziun de n’acordanza danter le presidënt dla Provinzia Arno Kompatscher y le suranstant dla RFI Maurizio Gentile a Maran.

La Junta provinziala tignará indoman, mertesc ai 5 de má, na sentada plü cörta en gaujiun dla vijita dl premier Matteo Renzi a Balsan. Al ne sará porchël gnanca degöna conferënza stampa dales 12:30.

Le suranstant dl govern Matteo Renzi sará indoman ( ai 5 de má) a Balsan. Tratan süa vijita él preodü n’incuntada cun le presidënt dla Provinzia Arno Kompatscher y cun le presidënt Ugo Rossi, sciöche ince na vijita al’aziënda Stahlbau Pichler por imparé da conësce da plü daimpró le model de formaziun dual dl Südtirol. Dales 11:30 él preodü na detlaraziun ala stampa.

www.14-18.europaregion.info é la misciun dl portal web dl’Euregio Tirol-Südtirol-Trentin che é dediché al centanar dla Pröma Vera Mondiala. Tla seziun „Let’s talk“ vëgnel aprofondí vigni mëis temesc nüs, cun domandes y respostes: tl mëis de má nen vara dl’entrada tl conflit dla Talia, che ai 23 de má dl 1915 ti á detlaré vera al’Austria-Ungheria.

Ince sce al á ploiü tles ultimes ores tl Südtirol, él gnü registré tl mëis d’aurí tröp sorëdl y dër pücia plöia: chësc é le ressüme mensil dl Sorvisc meteo dla Provinzia. Sön gran pert dl teritore él tomé na cuantité de plöia danter le 10 al 40 porcënt dl valur mesan, les temperatöres é romagnüdes danter 1 y 1,5 degrá sura i valurs plurianuai. La dé plü cialt é sté ai 22/04 a Auer cun 27,5°

Joseph Zoderer sará en mertesc, ai 5 de má tla Biblioteca provinziala dla Teßmann a Balsan: te chësta ocajiun liará l’autur fora dla pröma pert de süa opera leterara nöia. L’entrada por la serada de presentaziun é debann.