Atualità

Do le bilinguism tochera sëgn ince ala pert ladina dl ejame de trilinguism. L’ejam de ladin gnará insciö adaté al cheder de referimënt di lingac europeich y gnará partí sö tl dagní te trëi perts (scrit, da ascuté sö y a usc). Por ci che reverda le scrit ne sarál nia plü la medema proa por A y B, chësc á stabilí da püch la Junta provinziala.

Le pëis dl corp, les usanzes y i vic pro l’alimentaziun, l’ativité sportiva y le contest scolastich y familiar di scolars dla elementara é stá tl zënter dl stüde de livel nazional „Okkio – Ciara de tüa sanité“ che é gnü presenté incö, mercui ai 29 d’aurí dal’assessuria por la sanité Martha Stocker.

Le Museum ladin Ciastel de Tor de San Martin de Badia y le Museum Ladin Ursus Ladinicus a San Ciascian dauriará indô sües portes por vijites da en vëndres, al 1 de má dl 2015 cina la fin d’otober.

Sön 80 corieres che vëgn adorades tl trasport publich local él gnü taché sö sön la pert iadedô n placat cun le motif nü dla campagna de sensibilisaziun cuntra i inzidënc di motors sön strada „No Credit“. Chësta é öna dles mosöres preodüdes tl 2015 por sensibilisé i zitadins da rovëne te na manira sigüda y responsabla.

Vigni dé passél tla staziun dla ferata a Balsan danter 150 cina 200 profugs. La Junta provinziala á traté incö (28 de aurí) la situaziun che reverda la rëi d’aiüt y les strotöres de sostëgn por les porsones che röia adalerch. “L’Aziënda dles ferates dl Stat á detlaré so consens por mët a desposiziun n valgügn locai por organisé damí l’acoliënza temporana”, á anunzié l’assessuria Stocker.

La Junta provinziala mët a desposiziun 50 mile euro por n pröm intervënt de prescia tla fasa d’emergënza atuala do le tremoroz che á toché dassënn le Nepal. Tles proscimes edemes gnarál ejaminé plü mosöres de sostëgn por ti garantí n aiüt costant ala popolaziun locala.

La lege provinziala nöia sön le svilup dl teritore y dla sconanza dl paesaje dess ester tlera y saurida da capí, cun limic definis avisa che reverda la costruziun de frabicac te zones ciamó desponibles y valorisan le plann tecnich di ënc de consulënza. Chësc á sotligné incö (28/04) l’assessur provinzial Richard Theiner do la sentada dla Junta provinziala.

L’Orchestra sinfonica di jogn dl Südtirol (Jugendsinfonieorchester) chir mëmbri nüs: deache na pert di musizisć atuai ne podará nia plü fá pert dl’orchestra vëgnel chirí jogn y jones dai 14 ai 24 agn. Les domandes por stieres da sonadú por düc i stromënc d’orchestra pó gní dades jö cina ai 26 de má. La seleziun gnará fata tres n’aldiziun ai 14 de jügn a Balsan.

15 porcënt di zitadins dl Südtirol á n’alergia, cun les perzentuales che é tresfora en aumënt. „Le sorvisc d’informaziun sön le stöp de flu dl’Agenzia por l’ambiënt laora bele da plü co vint agn y s’á svilupé cun le tëmp te n stromënt d’informaziun dër d’ütl por i zitadins“, insciö l’assessur Theiner incö (24/04) pro la conferënza stampa de presentaziun dl stüde sön le stöp de flu a Leifers.

Ciamó en chësc ann dessel gní ciafé na soluziun ala mobilité tles Dolomites cun n regolamënt unitar dl trafich söi jus danter les Provinzies y Regiuns interessades. Chësc é gnü stabilí incö, jöbia ai 23 de aurí, te na sentada dl Consëi de fondaziun Dolomites UNESCO a Cortina, a chëra che al á tut pert ince i assessurs Richard Theiner y Florian Mussner.