Atualità

Da indoman (15 de aurí) podará i zitadins che fej la detlaraziun dles cutes s’anuzé dl formular 730 bele scrít fora sön la plata internet dl’Agenzia dles entrades. „Tl Südtirol – á splighé l’assessuria Waltraud Deeg – podará i zitadins scemplifiché la prozedöra cun la Cherta di sorvisc.“

Le proiet de spligaziun storica dl relief de Mussolini tla plaza dla Signoria a Balsan va inant: insciö ti él gnü surandé sëgn l’inciaria por la proietaziun, la direziun di laurs y le coordinamënt dla segurëza al davagnadú dl concurs, l’architët Luca Marchesoni da Balsan.

"Alplü tert cina ai 15 de má, mo plü sigü bele ala fin de aurí, gnará le premier talian Matteo Renzi tl Südtirol por sotescrí n’acordanza sön le svilup dl’autonomia südtiroleja“: chësc á anunzié incö (14 de aurí) le presidënt dla Provinzia Arno Kompatscher tratan n’incuntada cun i media do la sentada edemala dla Junta provinziala a Balsan.

L’Uniun Europeica á aprové dan da un n ann na regolamentaziun cheder nöia dles leges sön i apalc, incö á la Juna provinziala fát n ater vare por ajorné la lege provinziala atuala cun les diretives UE. „Cun la lege nöia ne gnarál nia mudé completamënter la lege atuala – á splighé le presidënt Kompatscher – mo al é n’ocajiun importanta por regolamenté danü chësc setur."

Do l’aprovaziun dla reforma sanitara da pert dla Junta provinziala él gnü tigní incö (13 de aurí) n’incuntada danter i rapresentanc dla Repartiziun Sanité y dl’Aziënda sanitara dl Südtirol por stabilí i proscims vari por la realisaziun dla reforma.

Motivé i jogn y les jones da se dé jö cun i museums y sü contignüs y sensibilisé i museums sön i interesc dla jonëza: chisc é i dui obietifs prinzipai dl ann tematich 2015 „Young & Museum“ dla Repartiziun Museums y dl’Assoziaziun Museums Südtirol. „I museums dess ester n post d’incuntada, de vita y de barat por nüsc jogn“, á sotligné l’assessur Florian Mussner tratan la presentaziun a Balsan.

Tl cheder dla colaboraziun danter le Departimënt Educaziun y Cultura Ladina y les Scores de musiga ladines él gnü laoré fora le poem musical “Rundenì de lijëndes” por rapresenté musicalmënter la tradiziun de valüta dles liëndes ladines. Le resultat final gnará presenté dai scolars y dales scolares ai 20 y ai 21 de aurí a Urtijëi y ai 24 de aurí a San Martin.

Le comerz de vijinanza funzionëia tl Südtirol ciamó sön döt le raiun, por mantigní chësta situaziun laora la Provinzia te döes direziuns: da öna na pert cun normes d’atuaziun por garantí na politica comerziala de dorada lungia, dal’atra pert cun n aiüt diret por sostigní le refornimënt di alimentars de basa. Chësc é gnü splighé incö dal presidënt Arno Kompatscher te n’incuntada cun i media.

Döes scovertes importantes á fát l’ann passé le Ofize di Bëgns archeologics dla Provinzia che á descurí döes statues menhir dl Eté dl Ram (2.900-2.500 dan G.C.) de marmor de Lasa ciafades a Vetzan tl Vinschgau. Les statues é gnüdes presentades incö (10 de aurí) dal assessur por i bëgns culturai Florian Mussner y dala direturia dl Ofize Catrin Marzoli a Frangart.

63 maestri de schi, sis maestri de paslunch, 22 maestri spezialisá tl telemarch y 11 maestri de snowboard é gnüs premiá incö (9 de aurí) a Balsan dal presidënt dla Provinzia Arno Kompatscher. Indöt gnarál lapró 102 maestri nüs y maestres nöies, i diploms ti é gnüs surandá incö tratan la fiera „Pro Winter“ a Balsan.