Atualità
-
La Provinzia se renovëia, dai 24 de merz na misciun nöia por la Rëi zivica
La Rëi Zivica oj plata: da en mertesc, ai 24 de merz sarà la misciun www.provinzia.bz.it completamënter y esculsivamënter a desposiziun dl’aministraziun provinziala, la Rëi Zivica sarà da ciafè tres la misciun www.reizivica.bz.it. La plataforma nöia dla Provinzia, che jarà online la proscima edema, sarà inće da ciafè por ladin.
-
App „Südtirol To Go“: Funziuns nöies y 20.000 desćiariades
Cun na iesta grafica nöia, na funziun de chirida otimisada y na seria de resultać miorada se presentëia da püch la app „Südtirol ToGo“ dl’Agenzia provinziala por la mobilité. L’app à arjunt sura 20.000 desćiariades y é desponibla por android, iOS y Windows Phone.
-
Imparè da conësce les istituziuns dl’UE: Euregio Summer School a Bruxelles
Inće chësc ann pitarà la Rapresentanza dl’Euregio Südtirol-Tirol-Trentin n’oportunitè por imparè da conësce da plü daimprò les istituziuns dl UE a Bruxelles. L’Alpeuregio Summer School ti darà la poscibilité a jogn laureà, y tl 2015 por le pröm iade inće ai studënć, da fà n’esperiënza direta a contat con les istituziuns politiches dl’Uniun Europeica. Domandes ćina ai 15 de aurì.
-
Biblioteca Teßmann: Le Tirol tratan la Pröma Vera Mondiala
“Sciöche la popolaziun dl Kronland â viüt la Pröma Vera Mondiala”: Le storiograf y publizist conesciü Michael Forcher tignarà en jöbia ai 26 de merz dales 20 da sëra n referat tla Biblioteca provinziala sön la storia dl Tirol tratan la Pröma Vera Mondiala.
-
Val d’Isarch: Le Sorvisc Strades mët man cun la manutenziun straordinara
Tles proscimes edemes metarà man le Sorvisc Strades dla Provinzia cun i laûrs de manutenziun straordinara dles strades. Tl raiun dla Val d’Isarch gnaràl investì 1,58 miliuns de euro por mosöres che reverda les strades provinziales y 1,19 miliuns de euro por laûrs sön les strades statales. „Cun i laûrs orunse ti pité ai zitadins strades plü sigüdes“, dij l’assessur Florian Mussner.
-
“War is Hell”: Le proiet cultural vëgn presentè ai 25 de merz a La Ila
En mercui ai 25/03 dales 11:40 y dales 20:00 gnaral presentè sön paladina dala pröma y la secunda tlassa dl lizeum linguistich da La Ila le resultat de n proiet cultural metü da jì dala Repartiziun Cultura y Intendënza Ladina y coordinè da Erika Castlunger. Les tlasses à laurè sö i aspeć desvalies dla vera en ocajiun dl aniversar dl scomënciamënt dla pröma vera mondiala.
-
„Vire l’intlujiun“, ai 20 de merz n convëgn a Toblach
„Vire l’intlujiun“, chësc é le titul de n convëgn che vëgn metü da jì dal’organisaziun ’Kooperation Pustertal’, na plataforma che cöi adöm y mët en rëi dötes les istituziuns y i sorvisc che laôra cun jogn y mituns. Le terminn por l’incuntada é en vëndres ai 20 de merz a Toblach, a chël che al tolarà inće pert i assessurs Philipp Achammer y Waltraud Deeg.
-
Archif provinzial: Les domandes por contribuć po gnì dades jö ćina ai 31/03
L’Archif provinzial conzed contribuć por la conservaziun de archifs privać, de plaonies y por le patrimone storich. Les domandes po gnì dades jö ćina ai 31 de merz dl 2015.
-
Sostëgn por l’esport: la Junta provinziala à aproè le program 2015-16
La Junta provinziala sostëgn cun mosöres spezfiches le svilup dles aziëndes y firmes locales sön le marćé dl laûr internazional. Do che le program cun mosöres de sostëgn é gnü stlüt jö tl 2014 à la Junta provinziala stabilì incö (17 de merz) da arlungé le finanziamënt por i proscims dui agn y da le armonisé cun les normes europeiches.
-
Dala Junta: proiet dla Laimburg de suraverda sön les ês y de pestizig
Sön proposta dl assessur por l’agricoltöra Arnold Schuler à la Junta provinziala aproè incö ( 17 de merz) te süa sentada edemala i critêrs por la conzesciun de aiüć tl setur di zidla ês, sön la basa dles diretives comunitares che mët a desposiziun fonds aposta dal’Uniun Europeica.