Atualità
-
99 domandes sön la storia dl Tirol: Presentaziun dl liber ai 13 de novëmber
La biblioteca Teßmann inviëia ala presentaziun dl liber „99 Fragen an die Geschichte Tirols“ che trata la storia dl Tirol te na manira conzisa y descritiva: le liber respogn a 99 domandes sön la storia dl Tirol, dal Pachet por le Südtirol, a Ötzi y Silvius Magnago cun spligaziuns storiches cörtes, scrites da plü esperć dla storia dl Südtirol. La presentaziun vëgn tignida ai ai 13/11 dales 20.
-
Stipendiums por chi che stüdia fora dl Südtirol: Domandes ćina ai 18/12
Da incö (05 de novëmber) inant él poscibl da fà domanda por stipendiums y rembursamënć dles tasses scolastiches por l’ann scolastich 2014/15 por scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol. L’ultimo dé por dè jö la domanda é ai 18 de dezëmber.
-
Dala Junta: Atres dezijiuns importantes da incö (04/11)
La Junta provinziala à aprovè incö (4/11) na regolamentaziun nöia por ći che reverda i contribuć de compensaziun ai paurs por i dagns tres le runćiamënt dles plantes, mosöra nezesciara por garantì la sconanza dl’agricoltöra. Implü à la Junta aprovè la spartiziun de 11 miliuns tres la „tassa idrica“ y tratè programs de frabiché sozial cuntra le smendrimënt dla popolaziun te de pici comuns.
-
Strades: program complementar cun 5 miliuns implü
13,24 miliuns de euro impede 3,24 miliuns: La Junta provinziala investësc tles strades dl Südtirol. Le secundo program complementar te chësc ann cun investimënć de cinch miliuns de euro é gnü aprovè incö (4 de novëmber) dala Junta provinziala y prevëiga revestimënć y tlandri dla strada nüs. Cun chësc finanziamënt gnaràl fat laûrs sön döt le teritore provinzial.
-
Presentaziun dla "lege omnibus sön l’istruziun" al Consëi scolastich
La presentaziun dl dessëgn de lege por ći che reverda les mudaziuns dla lege provinziala tl setur dl’istruziun y dl status iuridich dl personal didatich, le cheder cualitatif de referimënt dles scolines y scores y le plann anual dles ativitês scolastiches sportives por l’ann 2015 é stades inier (03/11) les tematiches sön l’ordinn dl dé dla sentada dl plenum dl Consëi scolastich provinzial.
-
Kompatscher y le vësco Muser sön la situaziun di profugs: Nia stlü i edli
Daidé les porsones che é sciampades da situaziuns de prigo ne é nia ma n compit istituzional mo n at de solidarieté y de umanité da pert de vigni zitadin: Chësc é stè l’apel portè dant incö (03/11) dal Presidënt Arno Kompatscher y dal vësco Ivo Muser te na conferënza stampa a Balsan olache al é inće gnü presentè les zifres dl’acoliënza tl Südtirol y anunziè na strotöra de pröm aiüt söl Prener.
-
Tl Südtirol él 72 iagri nüs (8 ëres y 64 ëi)
8 ëres y 64 ëi à passè da püch l’ejame da ćiacia tl Südtirol: a la maiù pert de chisc ti él gnü surandè incö (31 d’otober) tl Kolpinghaus a Balsan dal assessur provinzial Arnold Schuler l’atest d’abilitaziun por l’eserzize dl’ativité da iagher.
-
Incuntada al Eurac danter doturs y scienzà che laôra foradecà
Incö danmisdé, vëndres ai 31 d’otober, él gnü tignì tla sënta dl Eurac a Balsan n’incuntada danter l’assessuria Martha Stocker cun doturs y scienzà südtirolej che laôra foradecà y te d’atres regiuns talianes. L’incuntada é gnüda organisada dal’assoziaziun Südstern, tl zënter dla debatüda él stè l’orientamënt dl proiet de reforma dla sanité tl Südtirol.
-
Otober: Ćialt sura le valur mesan – Ona de frëit ti ultimi dis
Le mëis de otober, che se röia cun incö, jarà ite tla storia dl tëmp sciöche n mëis plü ćialt co le valur mesan. Cotan plü altes co mesanamënter é stades les temperatöres dandadöt tles prömes trëi edemes, la presënza de niores à portè implü a n mënder arbassamënt dla temperatöra tratan les nöts. Le Sorvisc meteo à mosorè temperatöres che s’avijinëia al valur mesan ma tl’ultima edema d’otober.
-
Sport sciöche materia de scora: Al ti é gnü surandè na petiziun a Achammer
N grup de laûr ti à surandè na petiziun cun indöt 1745 firmes al’assessur Achammer cun la ghiranza da arjunje le reconoscimënt dles ativitês sportives extra-scolastiches sciöche materia facoltativa dl percurs didatich. „Al é öna dles mies prioritês da colié de plü les ofertes sportives cun l’ativité scolastica“, à dit l’assessur, che presentarà tosc na proposta de soluziun.