Atualità
-
Aprovaziun dl dessëgn dl bilanz de previjiun: conferënza stampa en mercui
Por indoman, mertesc ai 28/10, él preodü na sentada de plenum danter i Consëis provinziai dl Trentin, dl Südtirol y dl Tirol a Schwaz tl Tirol. La sentada edemala dla Junta provinziala gnarà insciö sburlada a indoman da sëra cun sön l’ordinn dl dé l’aprovaziun dl dëssegn de lege sön le bilanz de previjiun 2015 y che le Presidënt Kompatscher presentarà te na conferënza stampa en mercui (29/10).
-
I museums dl Tirol storich y la comunicaziun dla Gran Vera
Le monn di museums dl’Euregio à metü tl zënter dl „Dé di Museums dl Tirol Storich“ che é gnü tignì incö a Trënt i aspeć dla comunicaziun museala de avenimënć storics en ocajiun dl aniversar di 100 agn dal scomenciamënt dla Gran Vera. Le cuinto congrès de ajornamënt por i colaboradus di museums dl Tirol, Südtirol y dl Trentin é stada n’ocajiun de confrunt sön i lingać de comunicaziun di museums.
-
La app ofiziala "Wetter Südtirol" é gnüda desćiariada passa 100.000 ia
La app ofiziala por i smartphons y i tablets dl Sorvisc dl tëmp dla Provinzia è dan man da jügn inant y à atira albü n gran suzès. La app, che é debann, é gnüda desćiariada passa 100.000 iadi - y le numer di utënć vëgn tres majer. La app vëgn ajornada regolarmënter inće por ladin.
-
Pest Euregio por la cooperaziun - Iscriziuns poscibles ćina ai 31 d'otober
„Implì de vita l’Euregio“: chësc é le slogan dl proiet transfrontalier nü che vëgn metü a jì tl raiun dl Euregio tles Regiuns dl Südtirol, dl Trentin y dl Tirol. La Junta provinziala à aprovè da püch la scomenciadia nöia che premiëia proieć de cooperaziun transfrontaliera. Les iscriziuns é davertes ćina ai 31 d’otober.
-
Proteziun zivila: La comunicaziun miorëia tres na rëi radiofonica digitala
Miorè l’efiziënza tla comunicaziun y smendrì i cosć dla manutenziun: l’assessur por la Proteziun zivila Arnold Schuler à presentè incö (24/10) adöm al diretur Hanspeter Staffler y al coordinadù Markus Rauch l’istalaziun de na rëi radiofonica unitara y digitala (TETRA) de comunicaziun por les organisaziuns dla Proteziun zivila y di sorvisc de pröm aiüt de volontariat che porta para de plü vantaji.
-
Pröma sentada dla Consulta di Studënć: Fallaha é la suranstanta nöia
Milena Fallaha dl Lizeum d’Ert „Cademia“ da Urtijëi é la suranstanta nöia dla Consulta di Studënć por les scores altes dles localitês ladines. La pröma incuntada danter la Consulta di Studënć nöia cun l’Intendënt Roland Verra é gnüda tignida dan da püch a Urtiijëi, te chëra che an à inće rajonè dl proiet „Buona Scuola“. Johannes Geier rapresentëia la Consulta tl Consëi Scolastich provinzial.
-
Scioper di feratiers indoman: Al é preodü che plü ferates toma fora
Les ferates regionales de Trenitala y de Trenord, sciöche inće ferates suraregionales de Trenord, podarà tomè fora o passè te intervai nia regolars indoman vëndres, ai 24 d’otober dales 9 ales 17 por gaujia de n scioper di feratiers. Sciöche anunziè dala Repartiziun Mobilité dla Provinzia é inće le personal dla SAD cherdè sö a n scioper por indoman por 24 ores y che dess mët man incö a mesanöt.
-
Museum Natöra: Daurida dla mostra „Liberi e selvaggi“ - Tesć inće por Ladin
40 fotografies dl artist Florian Schulz sön i spostamënć de tiers tl America dl Nord gnarà mostrades al publich da en lönesc ai 27 d’otober tl Museum Natöra Südtirol a Balsan. Le titul dla mostra speziala é „Wild, frei und mobil – Liberi e selvaggi". I tesć dla mostra sarà te cater lingać: ladin, todësch, talian y inglesc.
-
Scora alta ladina: L'ASTAT à publiché i resultać di ejams de reparaziun
Da püch él gnü publichè dal Istitut de Statistica provinzial ASTAT i resultać di ejams de reparaziun dles scores altes. Indöt 3.036 studënć te döt Südtirol à messü dè jö un o plü ejams de reparaziun por podëi passè l’ann de scora. 66 é le numer complessif di studënć dles scores altes tles localitês ladines che s’à presentè ai ejams de reparaziun (de chisc à 56 studënć ciafè n arat positif).
-
Dé di Museums dl Tirol storich ai 24 d’otober - Congrès a Trënt
Co pon pa comuniché la Gran Vera y i avenimënć dl 20ejimo secul ti ambiënć museai d’aldedaincö? A chësta domanda ti jaran do tratan l’ediziun de chësc ann dl „Dé di Museums dl Tirol storich 2014". L’incuntada transfrontaliera metüda a jì dal’Euregio Tirol-Südtirol-Trentin gnarà tignida por esperć dla cultura y di museums en vëndres ai 24 d’otober tles galeries dl Piedicastello a Trënt.